La Semiente celebra’l so V Amagüestu popular en L’Entregu

La Semiente celebra’l so V Amagüestu popular en L’Entregu
13 08:03 2015 Imprimir

Por quintu añu consecutivu el Centru Social Autoxestionau La Semiente entama un Amagüestu popular en 2 fases, una pa los neños y neñes y otra pa “la xente mayor”.

Va 5 años que La Semiente entamó a organizar la folixa serondiega por antonomasia n’Asturies. Un añu más el “menú” ta compuestu por sidra dulce y castañes asaes nel farol, y como siempre toes les actividaes son de baldre.

Como ye habitual La Semiente entama la xornada con un Amagüestu infantil de 5 a 7 de la tarde nel parque de La Llaguna. Nun va faltar el mayu tradicional pa que los más pequeños sepian d’onde sal esi manxar dorau que tanto presta, la sidre del duernu o dulce. Además los asistentes van poder pasalo en grande colos xuegos que dende esta asociación entreguina ya tienen preparaos pa los más pequeños. Por últimu, como ya ficieran l’añu pasau, tanto grandes como pequeños van tar acompañaos pola actuación del Grupu de Baille tradicional “L’Esperteyu” de L’Entregu.

Cuando la nueche caiga sobre’l Valle, la folixa trasladase al nuevu llar de La Semiente, nel númeru 1 de la Calle Nueva, onde como siempre van tar presentes Cerveza Caleya y Sidra L’Allume a precios mui afayaizos, además del restu de sidra dulce y castañes, a partir de les 8 la tarde. Pero además nel centru social cuenten con una programación pa tolos gustos, entamando pola música de Silvidos y Gemidos que van a ponei ritmu al asuntu dende les 9. Más tarde, será el turnu de les artes escéniques cola artista llocal Minerva y el su show “Unes rises con Minerva, Espectaculu de humor (con amor y seso)”. Y dempués del humor , llega la hora del micro abiertu onde animen a artistas del mundo folk, hip-hop y otros a mostrar les sos creaciones o improvisaciones. Pa finar, la cabera nota musical va ponela “Nochnepiche esbilla” con una pinchada de balkan, swing y fusión.

Dende La Semiente recuerden que nun reciben neguna subvención (pública ni privada) pa la realización d’esta u otres actividaes que fae el colectivu. Por otra parte, dende’l colectivu acepten donaciones de castañes, sin ser esto una condición pa venir a xintales.

  Article "tagged" as:
  Categories:
Loading Facebook Comments ...