La Selmana Negra refuerza’l so llau lliterariu pa ser “partida del difícil viaxe d’un llibru”

La Selmana Negra reivindica la lliteratura como un “actu de salú mental” imprescindible pa formar ciudadanos. El director del certame xixonés, l’escritor Paco Ignacio Taibo II, avanzó güei nesos términos l’especial procuru con que la XVII edición del eventu festivu y cultural va ocupase del mundu lliterariu, col envís declaráu de que’l certame puea ser el puntu de salida “del difícil viaxe d’un llibru”.

Pa facer realidá esa intención, la XVII Selmana Negra tien programaes un total de trece presentaciones absolutes d’otres tantes obres lliteraries, aumenta’l númberu de llibreríes presentes nel recintu, ponse en marcha un ‘supermercáu’ del llibru al pesu y prébase suerte allugando un puntu de venta de llibros enfrente l’escenariu central, nun intentu d’amestar al másimu posible fiesta y lliteratura.

La mecigaya nun ye n’absoluto nueva. Según precisó Taibo esti mediudía na presentación oficial de la XXVI Selmana Negra énte l’Atenéu Obreru de La Calzada, “folixa y cultura nun tán reñíes sinón que caminen xuntes”, y por eso el recintu’l certame nun prescindirá nesta edición de los habituales ingredientes festivos: Conciertos, bares musicales y espectáculos varios animarán una Selmana que repite allugamientu na marxe izquierda’l ríu Piles, al rodiu l’estadiu d’El Molinón, y que va cellebrase ente’l 9 y el 18 de xunetu.

Neses coordenaes centraránse les actividaes lliteraries poles que los organizadores apuesten de forma especial esti añu, nel convencimientu de que, según Taibo, “poder abrir un llibru y ser otru ye ún de los pocos actos subversivos que nos queden nes sociedaes descafeinaes”.

Ayudarán a ello les presencies de los autores policiacos Alan Furst, Robert Wilson, Marcello Fois y Petros Markaris; los arxentinos Guillermo Orsi, Carlos Balmaceda y Raúl Argemí; los estaoxunidenses Barbara Parker, Bob Reiss, Rebecca Pawel y James Hine; y los escritores españoles José Carlos Somoza, Paco González Ledesma, y Andreu Martín, ente otros. Habrá amás sendos homenaxes a los desapaecíos Manuel Vázquez Montalbán y Jean Claude Izzo, y tanto’l cómic como la ciencia ficción en castellán tendrán los sos llugares propios.

El director de la Selmana Negra presentó la edición númberu 17 del certame nun actu públicu cellebráu na cai, énte la fachada principal del Atenéu de La Calzada, doble símbolu que reivindica la Selmana al dicise heredera de la “illustración llabrada pola clase obrera”. Y puestos a pisar la sienda de la politización, el conceyal de Festexos del Ayuntamientu de Xixón, Iván Álvarez Raja, vinculó l’aniciu del veranu xixonés col empiezu’l certame, qu’espera que nesta edición “valga pa democratizar a una parte de la ciudá que se foi resistiendo”.

Nel actu tomó parte tamién el gaiteru Manolo Quirós, ‘alter ego’ de la mascota de la Selmana Negra, ‘Rufu’, qu’esti añu representa precisamente un gaiteru ataviáu cola tradicional montera picona y dotáu de les habituales gafes de sol.