La Selmana Negra apuesta pol protagonismu de los llibros y la so apertura a tolos xéneros

by asturnet | junio 27, 2005 11:48 pm

[1]

La Colexata de San Xuan Bautista foi l’escenariu escoyíu polos responsables de la organización de la Selmana Negra de Xixón pa presentar oficialmente’l programa de la so edición númberu dieciocho. Resaltar el protagonismu del llibru y del fomentu a la llectura como motivos cimeros d’esti festival lliterariu ye l’oxetivu sobre’l que va centrase esta XVIII Selmana qu’empieza el prósimu viernes 8 cola llegada del avezáu Tren Negru y que se prollonga hasta’l 17 de xunetu. Respective a la identidá del festival, Paco Ignacio Taibo II señaló qu’esta “ta arreyada a la ciudá de Xixón, equí nació y equí ha morrer”.

Nel so tonu desenfadáu y charramplán característicu el responsable de la Selmana Negra aprovechó la presentación pa facer un repasu a la hestoria d’estes dieciocho ediciones y tuvo pulles ocurrentes pa los detractores del eventu, cuando remembró que “hasta nos criticaron los miembros d’una asociación antitaurina y nós preguntábamos: ¿y qué carayu tenemos nós que ver colos toros?”. Taibo, en tonu más seriu, remembró que’l principal protagonista del festival yera el llibru y esti añu va tener un papel más descatáu con iniciatives como la novedosa incorporación al eventu: un inxeniu nomáu LOM (Librería de Oportunidad Móvil), una cinta tresportadora -asemeyada a les de la salida d’equipaxes de los aeropuertos- pela que van circular llibros de saldu a espera de la so caza polos llectores.

L’apertura a otres lliteratures de xéneru, amás del negru, como’l fantásticu, la ciencia ficción o la novela hestórica, ye otra de les característiques novedoses de la XVIII, que va cuntar tamién con espacios dedicaos a la poesía, con dos velaes de llectures: una protagonizada poles nueve poetes moces seleccionaes n’antoloxía “La verdadera historia de los hombres”, ente elles les asturianes Ana Vanessa Gutiérrez y Rosana Popelka; la segunda velada, van ofrecela dos autores ya habituales de la Selmana: Ángel González y Luis García Montero.

Nel apartáu musical, pel escenariu central del recintu de la Selmana Negra, van desfilar músiques pa tolos gustos: Sexy Sadie, Anabel Santiago, la Big Band Terressa, la fanfarria de xitanos rumanos Ciocarlia, Muchachito Bombo Infierno o Charmaine Neville son los nomes principales de los conciertos, ente los que va haber tamién una jam sessiom de gaiteros asturianos.

Ente la nómina d’autores presentes nesta dieciocho edición del alcuentru lliterariu-festivu, escritores como Peter Berling (l’autor de la tetraloxía “Hijos del Grial”), Christopher Priest, Andrezj Sapkowski o Giles Courtemanche, a los que se vam unir otros como González Ledesma, Carlos Quílez, Raúl Argemí o la noruega Anne Holt. Tamién autores españoles como José Carlos Somoza, Almudena Grandes, Hermán Migoya, Raul Guerra Garrido, Lorenzo Silva o l’asturianu Rodolfo Martínez, ganador del Premiu Minotauro cola so novela: “Los sicarios del cielo”.

Amás del avezáu alcuentru internacional de Fotoperiodismu, el cómic va ser otru de los protagonistes d’esta Selmana con entrambes esposiciones, una d’homenaxe a la xeneración de dibuxantes ya ilustradores de la transición y una amuesa con obres de creadores de les últimes xeneraciones. El capítulu solidariu va tar dedicáu esti añu a recaudar fondos pa la construcción d’un orfanatu n’Haití. Un homenaxe a Emilio Salgari patrocináu pola marca de refrescos qu’esponsoriza la Selmana Negra y nel que diversos creadores recreen la so particular visión del autor de “Sandokán” ye otra de les novedaes qu’ufierta la XVIII edición.

Web de la Selmana Negra de Xixón[2]

Endnotes:
  1. [Image]: http://asturnews.com/bancofotos/fotos/2/1198.jpg
  2. Web de la Selmana Negra de Xixón: http://www.semananegra.org/

Source URL: http://asturnews.com/la-selmana-negra-apuesta-pol-protagonismu-de-los-llibros-y-la-so-apertura-a-tolos-xeneros/