Portada Conceyos La Selmana la Tapa 2022 tará en 26 chigres d’Avilés hasta’l 11 de setiembre

La Selmana la Tapa 2022 tará en 26 chigres d’Avilés hasta’l 11 de setiembre

by redacción asturnews

Esta selmana tuvo llugar nes instalaciones del chigre FILAN d’Avilés, na cai Rivero, la presentación de la XVII edición de la Selmana de la Tapa, entamada pola sección d’hostelería de la Unión  de Comerciantes d’Avilés y Contorna (UCAYC), y que cunta cola collaboración del Conceyu d’Avilés y de distintes firmes comerciales.

La presentación corrió al cargu de la conceyala de Turismu del Conceyu d’Avilés y presidenta de la Mancomunidá, Raquel Ruiz, y del responsable d’hostelería de UCAYC, Rafael Bonilla, asistiendo tamién otros hosteleros participante y representante de la Cámara de Comerciu, firmes comerciales patrocinadores y otros representantes municipales.

Dende’l próximu 5 de setiembre y hasta el 11 del mesmu mes, en 26 establecimientos d’Avilés, Villalegre y Salinas, podrán tastiase estos mini taragaños de la cocina avilesina, nos restoranes, enoteques, chigres, sidreríes participantes.

Editáronse 7.000 gastromapes nos que consten tolos participantes, y que van dexar a los veceros faer la so particular ruta de tapes por ellos pa escoyer a la Tapa Reina, pudiendo sellar cuatro establecimientos distintos y optar a los premios d’esti concursu gastronómicu, fuertemente enraigonáu nel calendariu veraniegu avilesín, y que van dende visites y estancies en bodegues de Galicia y La Rioxa, a nueches d’hotel y otros premios, como l’otorgáu pola firma comercial Coca-Cola por xubir semeyes de tapes xuntu con una Coca-Cola a Instagram utilizando’l hashtag semanadelatapa2022.

Los gastromapes pueden consiguise nos establecimientos participantes, na oficina de turismu d’Avilés y tamién na see de UCAYC, tando tola información de la Selmana de la Tapa disponible en www.ucayc.es

La Selmana de la Tapa 2022, que los sos premios conoceranse’l 29 de setiembre, aspira a repitir,  ya inclusive superar, los datos de la pasada edición de 2021, na que según datos ufiertaos por tolos establecimientos d’hostelería participantes, vendiéronse 8.702 tapes mientres los díes de duración del eventu gastronómicu, que yá supunxo un 15 % de medría sobro la edición realizada nos más duros momentos de la pandemia que como sociedá sufrimos nos postreros dos años.

Tamién te podria gustar