La Selmana de les Lletres va centrase na vida y obra de Nel Amaro

La programación de la Selmana  de -yos Lletres Asturianes va incluyir na programación de la so 42ª edición dos esposiciones y la presentación d’un documental y de dos llibros sobro la vida y la obra de Nel Amaro, iniciatives preparaes espresamente pa la ocasión.

La Conseyería de Cultura, Política Llingüística y Turismu vieno acabante dar anuncia de que va homenaxear nesta convocatoria al escritor mierense, al coincidir colos diez años de la so muerte y los 75 de la so nacencia. Les actividaes, como ye tradición, van programase na primer selmana de mayu y nesta ocasión van tar dirixíes pol escritor y profesor Xandru Fernández, quien s’encarga de coordinar les publicaciones y principales conteníos del homenaxe institucional y ciudadanu a la figura de Nel Amaro.

Los dos llibros que la Dirección Xeneral de Política Llingüística va publicar con esti motivu van ser una estensa antoloxía de la so obra, escoyida y comentada por Xandru Fernández, y un volume colectivo qu’inclúi artículos d’escritores ya investigadores sobro l’escritor y el so tiempu, y abondosu material gráfico.

Nel Amaro (1946-2011) xune a la so faceta de ceador lliterariu la condición de persona activa y determinante na vida social y cultural d’Asturies. Novelista, dramaturgu, editor de revistes, autor de performances o introductor de la poesía visual n’Asturies, Amaro ye unu de el escritores más versátiles y prolíficos de la lliteratura asturiana moderna.

Unu de los principales oxetivos de la Selmana de les Lletres Asturianes ye la recuperación y divulgación d’un autor o autora, pa xunir el so nome a la nómina de los clásicos de la lliteratura asturiana. N’ediciones anteriores fueron homenaxaos, ente otros, Antón de Marirreguera, Xosefa Xovellanos, Xuan María Acebal, María Josefa Canellada, Enriqueta González Rubín, Mánfer de la Llera o María Teresa Villaverde, Tuxa.