La Selmana de les Lletres Asturianes entremez cuatro sieglos nel actu

Esta mañana presentábase nel patiu de la Conseyería de Cultura la XXVII Selmana de les Lletres Asturianes que se va cellebrar dende’l vienres 28 d’abril hasta’l domingu 7 de mayu y qu’esti añu va tar dedicada al mundu del teatru. Baxo’l títulu de “Teatru a escena. Cuatro sieglos nel actu” los conceyos asturianos van poder esfrutar de más de cuarenta actos diferentes, que van dende la llectura dramatizada de poemes en collaboración cola Institució de les Lletres Catalanes, la cellebración de conferencies como la que vuelve traer a Asturies al escritor Jon Cortázar, o la representación de tou tipu pieces, mesmo de calter modernu que la recuperación y actualización de les antigües comedies de guirrios. Llibros, DVDs y monólogos, enllenen una selmana cultural qu’empieza cola presentación del llibru de Dolfo Camilo Díaz, “En tables. Un teatru pal sieglu XXI”.

Los poetes asturianos Berta Piñán, Xuan Bello, Vanessa Gutierrez y Xandru Fernández, xunto a los catalanes Ponç Pons, Núria Martínez Vernis, Àngels Gregori y Jordi Cornudella, van llevar a escena l’espectáculu “Voces paraleles” que, de la mano de la Institució de les Lletres Catalanes y en collaboración col conceyu de Grau y l’Aula de les Metáfores, va tener llugar el día 28 d’abril a les ocho la tarde na Capiella de los Dolores de Grau. A les doce la mañana d’esi mesmu día, na Biblioteca Perez de Ayala d’Uvieu, l’escritor Dolfo Camilo Díaz va facer presentación del llibru “En tables. Un teatru pal sieglu XXI”.

La presentación oficial d’esta Selmana de les Lletres sedrá’l día 2 de mayu, nel patiu de la Conseyeria de Cultura del Principáu d’Asturies pa, actu siguíu, dar pie a la inauguración de les Xornaes de Teatru “Universidá n’escena”, que van llevar al Salón d’Actos de la Biblioteca del Campus del Milán, en collaboración col Seminariu de Filoloxía Asturiana y el Departamentu de Filoloxía Española, tou tipu de conferencies, de la mano d’autores tan conocíos como Montse Garnacho, d’Inmaculada Urzainqui, Boni Ortiz o Jon Cortázar, asina como representaciones d’autores asturianos que van dende Antón de Marirreguera al mozu Chechu García.

Pero como nun podía ser menos, na Selmana de les Lletres Asturianes dedicada al teatru, los grandes protagonistes son los propios autores asturianos, que van recibir un homenaxe per parte d’una escultura del artista Fidel Pena que sedrá inaugurada’l día 2 de mayu nel Teatru Palacio Valdes d’Aviles, y les compañíes teatrales asturianes. Telón de Fondo, Margen, Bacanal Teatro, Nun Tris, Higienico Papel, la Compañía Asturiana de Comedies, Traslluz, N’alpargates y orbayando, El Hórreo, l’Asociación Juan Manuel Mendez, Xana, Pico de Faro, Teatru Casona, Teatru Pausa, Penedo Aballón, los monologuistes d’AICA o’l director Eladio de Pablo van percorrer los teatros de toa Asturies a lo llargo de la selmana con pieces d’autores asturianos como Dolfo Camilo Díaz, Manuel Galano o Pedro Lanza y adaptaciones de clásicos estranxeros como Franz Kafka, Jaime Salom o Strindberg.

La espublización de llibros como “Del chigre” de Carlos Alba Cellero, una númberu especial de la Revista La Ratonera, dirixida por Roberto Corte y Pedro Lanza, dedicáu al teatru asturianu y la edición del DVD “Pieces”, que va ser presentáu por Ramón Lluis Bande y Javier Maqua, y que va ser distribuyíu de baldre nel Día de les Lletres Asturianes, son dalgunos de los acontecimientos d’esta selmana cultural, na que nun va faltar una mirada al pasáu de la mano de l’Asociación pola Recuperación de los Sidros y les Comedies que va llevar a Noreña la obra “Llegó la modernidá” (comedia de guirrios).