Portada Educación La selectividá supera por primer vegada el 90 por cientu d’alumnos aprobaos

La selectividá supera por primer vegada el 90 por cientu d’alumnos aprobaos

by asturnet

Los estudiantes preuniversitarios superen por primer vegada el 90 por cientu d’aprobaos nes prebes de selectividá. Un total de 3.695 de los 4.087 alumnos que concurríen a los esámenes d’accesu a la Universidá -cuyes notes oficiales asoléyense güei- algamaron una nota superior al 5, con bonos resultaos en Bioloxía, Matemátiques y Llingua Castellana y peores calificaciones n’Inglés.

Según los cálculos de la Universidá d’Uviéu, institución encargada de la convocatoria, cordinación y corrección de les prebes, el porcentaxe d’aprobaos allúgase esti añu nel 90,4 por cientu, lo que supón el ‘techu’ algamáu na hestoria de la selectividá n’Asturies y facilitará-yos a los estudiantes l’accesu en primer instancia a la carrera que nagüen estudiar.

La nota media de los esámenes, magar del ascensu porcentual d’aprobaos -un 1,5 por cientu respecto a 2003-, asítiase poco más arriba de la calificación de suficiente: Un 5,85, pero con variaciones sustanciales ente unes y otres asignatures. Asina, los alumnos esaminaos superaron nun 86 por cientu la preba de Bioloxía, un 82,5 por cientu aprobó Llingua Castellana, un 79 por cientu sacó más d’un 5 en Matemátiques y alpenes un 55 por cientu fue quien a aprobar l’esamen d’Inglés.

Con resultaos talos, les previsiones de la Universidá pasen por poder asigna-yos un pupitre nes sos aules a nueve de cada diez estudiantes asturianos coles prebes superaes, anque abondos de los alumnos optarán por titulaciones non impartíes n’Asturies y tramitarán la so matrícula n’Universidaes ayenes a la d’Uviéu.

Los esámenes de selectividá, qu’en principiu diben cellebrase por última vegada pero qu’agora tendrán continuidá al paralizar el nuevu Gobiernu central l’aplicación de la Llei orgánica de Calidá de la Enseñanza, movilizaron a más de 4.000 estudiantes preuniversitarios del Principáu ente los pasaos 15 y 17 de xunu.

Llistáu de calificaciones oficiales

Tamién te podria gustar