La RTPA pon en marcha un portal cultural n’asturianu

17 mayu 23:56 2007 Imprimir

Dende ayeri xueves 16 de mayu la RTPA vien espublizando en prebes un portal cultural n’asturianu que baxo’l nome de “estaya d’asturianu” supón la ufierta de conteníos n’asturianu del ente público nel ámbitu dixital y que desendolca la empresa Ámbitu, editora de Les Noticies. Con esti pasu alantre paez definitivo que nun se vayan ufiertar les noticies del canal principal en llingua asturiana.

Les noticies d’estaya d’asturianu, d’actualización diaria, distribúinse en seis secciones: sociedá, música, llibros, arte, cultura tradicional, cine, teatru y TV y nelles recuéyense les informaciones que fain referencia a la celebración d’actos culturales, novedaes y concursos lliterarios, conciertos, actuaciones, festivales, etcétera, cola fin de dar cobertura a la mayor parte de l’actualidá que se produz diariamente nel ámbitu cultural asturianu.

La canal cuenta tamién con una sección complementaria que recueye toles convocatories que fain les alministraciones públiques y instituciones del Principáu relacionaes cola promoción y difusión del asturianu, tales como subvenciones, beques, ayudes, cursos de formación y premios.

Estaya d’asturianu completa la oferta informativa con una Axenda, na que, de forma abreviada, publícase un calendariu d’actos culturales. La páxina tamién dispón d’espacios pa la promoción de los programes n’asturianu que s’emiten en TPA y RPA.

El site nuevu utiliza na denominación de la so cabecera la versión ‘e’ minúscula de la marca principal de RTPA y va formar parte del menú de secciones del periódicu dixital, anque tamién se puede acceder a él a traviés d’un banner allugáu na home de rtpa.es o directamente na dirección http:// www.estayadasturianu.es.

  Categories:
Loading Facebook Comments ...