La RTPA niéga-y informes sobre la marxinación del asturianu a la Procuradora Xeneral d’Asturies

by asturnet | agosto 26, 2010 10:04 am

Según vieno acabante denunciar la Xunta pola Defensa de la Llingua, La RTPA (Radio Televisión del Principáu d’Asturies) lleva más de cuatro meses negándose a entregar los informes solicitaos pola Procuraduría Xeneral d’Asturies sobre’l tratamientu de marxinación que carez la llingua asturiana na so programación.

Dende la oficina de la Procuradora Xeneral confirman que yá solicitaron los citaos informes en dos ocasiones y nun tuvieron rempuesta dala.

La Xunta pola Defensa de la Llingua Asturiana (XDLA) entamó va dellos meses una campaña per Internet pa pidir a los miembros de la dirección de la RTPA más programación n’asturianu, con meyores horarios y más amplitú temática, y el respetu a la toponimia oficial na programación en castellanu. Según asoleya nuna nota de prensa, la Xunta ufrió “un modelu de carta y les señes de corréu electrónicu de la dirección de la RTPA a les que la mandar. Gracies a la iniciativa tamos pudiendo ver cómo, hasta’l día de güei, son más de 5.000 los mails qu’aportaron a les diferentes cuentes de los dirixentes del serviciu públicu de televisión d’Asturies. La XDLA quier agradecer l’ésitu d’esta campaña a toles persones que participaron nella”.

De la mesma manera fain anuncia de “qu’esta campaña sigue activa pa toles persones que quieran sumase y, amás, completóse cola presentación d’una quexa oficial énte la Procuradora Xeneral d’Asturies, que tien ente les sos funciones la defensa de los derechos de la ciudadanía asturiana y el cumplimientu de les disposiciones llegales d’ámbitu autonómicu, estatal y européu. En cumplimientu d’estes funciones la Procuraduría solicitó delles veces la documentación pertinente al Ente Públicu RTPA, pero esti, en rebeldía contra les instituciones democrátiques y les disposiciones de la llexislación vixente, niégase sistemáticamente a la entrega d’información y al cumplimientu de la llegalidá”.

Por mor d’esto, dende la Xunta pídese “una actuación contundente dende les instituciones encargaes de velar polos derechos cívicos y pol cumplimientu de les disposiciones llegales asturianes, estatales y europees”.

Source URL: http://asturnews.com/la-rtpa-niega-y-informes-sobre-la-marxinacion-del-asturianu-a-la-procuradora-xeneral-dasturies/