La revista de cómic El Wendigo piensa n’echar el pieslle depués de tres décades nel mercáu

by asturnet | julio 28, 2004 11:48 pm

Amorrenta un ‘dinosauriu’ del cómic n’Asturies. Los responsables de la revista xixonesa El Wendigo piensen n’echar el pieslle a la cabecera, nel mercáu dende 1974, tres de la publicación del númberu cien, que yá ta na cai y qu’inclúi sendes entrevistes a los autores Sydney Jordan y Moebius, nun volume especial con 48 páxines y un suplementu a collor.

Na páxina web de la revista, cuyu equipu organiza’l festival Internacional del Cómic del Principáu d’Asturies, esprésase la posibilidá de que’l númberu cien seya’l caberu col que la publicación salga a la venta, depués de tres décades de continuidá que ficieron d’El Wendigo la revista de crítica de cómic más veterana del Estáu.

Agora los sos responsables, lideraos pol director de la publicación, Faustino Rodríguez Arbesú, almiten que trenta años de camín son abondo y avancen que ye mui probable l’adiós de la revista, en cuya plantiella de redactores figuren Ramón Fermín Pérez, José María Flores y Florentino Flórez.

Nel últimu númberu d’El Wendigo incorpórense, ente otros conteníos, una crónica’l Salón Internacional del Cómic d’Asturies na so edición de 2003, un artículu sobro l’autor Rubén Pellejero y un testu monográficu dedicáu al retornu de de Richard Corben, tituláu ‘Planchas, viñetas y bocadillos’.

Web oficial de la revista[1]

Endnotes:
  1. Web oficial de la revista: http://www.elwendigo.com

Source URL: http://asturnews.com/la-revista-de-comic-el-wendigo-piensa-nechar-el-pieslle-depues-de-tres-decades-nel-mercau/