La revista cultural “El Súmmum” espubliza’l númberu 28, que yá pue descargase de baldre

Dende va unos díes pue atopase pelos llugares habituales de distribución el númberu 28 de la revista cultural gratuita “El Súmmum”, publicación billingüe de la editorial Ámbitu de calter trimestral y dedicada a les nueves tendencies artísques y lliteraries. Un magazine que dende va dellos númberos ye tou color.

Nesti númberu apaecen atopase collaboraciones lliteraries (como la escueta postal que’l poeta aragonés Manuel Vilas fai de la ciudá de Zaragoza o l’amplia entrevista que Jaime Priede fai-y a Ricardo Menéndez Salmón, novelista que ta acabante sacar nes estampes de Seix Barral una última novela titulada «Derrumbe»); amás d’esto, ente munches otres ayalgues, una reseña de Víctor Rodríguez sobre Iron Maiden, un ensayu de Víctor Vila sobre’l cantautor francés Serge Gainsbourg, una reflexón de Lino G. Veiguela sobre The Rolling Stones o la semblaza sentimental que Xune Elipe, cantante de Dixebra, fai de Corto Maltés, el personaxe d’Hugo Pratt…

Amás pue atopase na revista, una entrevista a Pablo X. Suárez y Sergio Gutiérrez Camblor, fecha por Rafael Valdés, un reportaxe sobre les pintures parllantes de Filippos Tsitsopoulos y una entrevista a Garikoitz Gamarra y Andeka Larrea, autores de «Bilbao y su doble».