Portada Educación La reválida va tener seis asignatures que van poder sumar hasta 14 puntos

La reválida va tener seis asignatures que van poder sumar hasta 14 puntos

by redacción asturnews
Foto: La Moncloa - Gobierno de España (https://www.flickr.com/photos/lamoncloa_gob_es/)

Los alumnos de segundu de Bachilleratu qu’a partir d’anguaño preséntense a la prueba que sustitúi a la Selectividá, y que sirve d’accesu a la Universidá, van tener qu’esaminase de seis asignatures d’esi cursu, coles que van poder llograr un máximu de catorce punto.

Asegurolo esta fin de selmana pasada’l presidente de la Conferencia de Rectores CRUE, Segundo Píriz, en declaraciones que fizo en entrevistase col ministru d’Educación, Íñigo Méndez de Vigo, p’alcordar los cambeos na evaluación final de Bachilleratu, qu’afita la Lomce a partir d’esti cursu.

Píriz esplicó que l’exame va tratar sobre seis asignatures troncales, cuatro d’elles van sirvir pa computar de 0 a 10 y dos p’aquellos alumnos que precisen nota de corte más alta p’aportar a unos graos, pos van sirvir pa puntuar ente 10 y 14. “Básicamente trátase de que se van esaminar de les asignatures de segundu de Bachilleratu”, aprofió Píriz, qu’añedió que se trata d’un sistema “bien similar” al qu’había hasta agora.

“La comunidá educativa ta razonablemente satisfecha, anque puedo entender que daquién nun tea d’alcuerdu”, argumentó’l tamién rector de la Universidá d’Estremadura, quien señaló que cree que les comunidaes autónomes tán “satisfeches” cola decisión tomada.

El ministru d’Educación, pidió nuna entrevista n’Antena 3 “tranquilidá” porque “va ser una prueba bien paecida a l’anterior PAU”. El titular d’Educación, Cultura y Deporte recordó que se comprometió coles comunidaes autónomes y colos partíos a reformar les reválides de la ESO y Bachilleratu al traviés d’un decretu llei “y eso ye no que toi trabayando”.

Tamién te podria gustar