Portada Educación La reforma educativa dexaría superar Bachilleratu con un suspensu

La reforma educativa dexaría superar Bachilleratu con un suspensu

by redacción asturnews
Foto: srgpicker (https://www.flickr.com/photos/srgblog/)

El documentu que manexa’l gobiernu pala reforma educativa que vieno acabante d’anunciar esti mes paez que dexaría superar Bachilleratu con un suspensu, sigún toles fontes onsultaes.

El borrador de reforma de la Lomce que’l Gobiernu pretende aprobar la próxima primavera, si antes llogra los sofitos políticos suficientes, inclúi dos midíes de caláu pa tratar d’aumentar el númberu de mozos que llogren el títulu de Bachilleratu y, poro, amenorgar l’altu porcentaxe esistente n’España d’abandonu de los estudios posobligatorios.

El documentu que la ministra d’Educación quier llevar antes de fin d’añu a l’aprobación del Conseyu de Ministros y en xineru al Parlamentu, preve que los alumnos de Bachilleratu puedan llograr el títulu académicu anque terminen el ciclu con una asignatura suspensa siempres que se cumplan determinaes condiciones. Na actualidá, pa llograr el títulu de Bachilleratu, y asina poder realizar les pruebes d’accesu a la universidá o matriculase nun ciclu cimeru de FP, ye indispensable tener aprobaes toles materies que s’estudien nos sos dos cursos.

La idega ye aplicar al Bachilleratu una midida que dende va años yá esfruten los estudiantes universitarios. «La posibilidá de llogru del Bachilleratu por compensación en casu de superar toles materies salvu una», indica’l borrador de reforma de la Lomce. Esti mecanismu de compensación consiste en que la xunta d’evaluación del centru educativu analice la trayectoria académica del estudiante y decida si adquirió les conocencies y les competencies abondes pa titulase en Bachilleratu con independencia de la materia suspenso.

Esta posibilidá, sía que non, nunca taría a valir antes del próximu cursu (el 2019-2020), porque por bien urxente que se tramitara y aprobara la reforma de la Lomce el ministeriu tien como oxetivu empezar a esplegar los sos efectos nel exerciciu siguiente.

La segunda midida incluyida nel borrador ellaboráu pol ministeriu y empobinada a embrivir el númberu de mozos de Bachilleratu que nun llogra titulase, y que polo tanto que se cierra les puertes a ampliar el currículu con estudios cimeros, ta pensada pa dar una segunda oportunidá a los repetidores. La propuesta, que como tol proyectu lexislativu ta suxeta a cambeos mientres el so trámite parlamentariu, ye la posibilidá escepcional» de que los estudiantes con mayores dificultaes (los repetidores) puedan disponer de trés años en cuenta de dos pa poder titulase en Bachilleratu.

La midida taría enfocada a quien tendría de repitir primero de Bachilleratu por suspender más de dos asignatures. Abriríase-y la posibilidá de que nel so segundu añu nel ciclu podría cursar les materies que tenga pindies de primeru y dalguna del segundu cursu, por qu’asina pueda tratar d’aprobar con mayor facilidá nel tercer añu’l restu d’asignatures de segundu que-y dexaren titular se. Esta regulación flexible» del Bachilleratu podría beneficiar al ente 10% y 15% de los estudiantes que cada cursu de media repiten n’España nesti ciclu educativu, munchos de los cualos, ensin esa facilidá, terminen per abandonar los estudios.

El proyectu de reforma preve planes personalizaos d’estudios p’ayudar a titulase a los repetidores de la ESO, termina colos itinerarios qu’a partir de terceru de la ESO empobinaben a los alumnos a Bachilleratu o FP, y preve la posibilidá de que los alumnos de FP Básica llogren el títulu d’ESO si l’equipu docente cree que cumplen los oxetivos y competencies necesarios.

Tamién te podria gustar