La reforma de la EBAU va tener qu’esperar

La reforma de la EBAU va tener qu’esperar
08 abril 08:50 2020 Imprimir

Lo que paecía tan urxente a principios del mes de marzu pue que agora yá nin siquier sía importante. Asocedió en tolos aspeutos. Nun cursu qu’avanzaba con una reforma educativa en mente y con munches mires puestes na posibilidá d’una nueva prueba d’accesu a la universidá, asocedió que lo único importante ye terminar el cursu. De forma telemática, probablemente, con conteníos afechos y col únicu oxetivu de que naide lo pierda.

Lo mesmo va pasar cola EBAU. Tan criticada l’añu pasáu. Meses esperando por una reforma. Una comisión de trabayu que, en realidá, nunca empezó a trabayar. Y, depués, l’anunciu de que, siquier anguaño, tou siguiría igual. Lo que, a la fin, paez una ventaya, porque afaer un nuevu modelu d’exame d’accesu a la universidá coles escepcionales circunstancies d’esti cursu, fuera infinitimente más complicáu.

Lo qu’hasta agora ta decidío ye que va haber EBAU. Que va ser, según les comunidaes autónomes, ente’l 22 de xunu y el 10 de xunetu, en convocatoria ordinaria, y antes del 10 de setiembre, la estraordinaria (anque el directores de Secundaria tán pol llabor de qu’esa segunda convocatoria nun se retrase tanto). Qu’el modelu va tratar d’afaese a les circunstancies, de tala forma que los estudiantes esaminar del temariu que dieren y non del que, ensin dulda, va quedase fora. Anque segundu de Bachilleratu ye l’únicu cursu que tien ciertu vistu bonu p’adelantrar materia de forma telemática, ente que pal restu de niveles la orde ye repasar y afitar.

Y coles mesmes, la esperada reforma de la selectividá, de la que taben pendientes rectores, los estudiantes y les comunidaes autónomes más o menos crítiques col modelu actual, va tener qu’esperar. Quiciabes, y solo quiciabes, lo qu’asoceda anguaño sía un puntu d’inflexón pa repensar la fórmula. Porque, como diz el director d’un institutu asturianu, «siguimos faciendo’l mesmu exame que va venti años, pero nin los estudiantes nin los estudios nin la forma d’estudiar ye la mesma que va venti años».

Tantu’l Ministeriu d’Educación como’l d’Universidaes y les Comunidaes Autónomes son conscientes de la dificultá que ta suponiendo pal profesoráu qu’imparte clase en segundu de Bachilleratu y pa los estudiantes d’esti cursu.

Por ello, p’asegurar que l’accesu a la Universidá produzcase en términos de equidad y xusticia, alcordóse modificar el modelu y el conteníu de les pruebes, con cuenta del alumnáu nun se vea perxudicáu por nun haber trabayáu en clase dalgún bloque de conteníu.

  Categories: