La rede europea de escueles de música tradicional aconceya en Nava

La Casa de Cultura del Ayuntamientu de Nava va agospiar güei y mañana los participantes de la iniciativa comunitaria “Entramus” (European net of traditional music schools). Nesti proyectu europeu, qu’entamó en 2004 enbaxo l’aición europea Grundvig del programa Sócrates, colaboren escueles de música tradicional d’España, Italia, Finlandia y Portugal.

Pa festeyar el fin d’esta iniciativa van cellebrase un ciclu de conferencies y los conciertos de la Bandina de la Escuela de Música de Nava, la agrupación de baile tradicional de la Escuela de Música Tradicional Los Yerbatos de Bimenes, la Loimaan Seudun Musiikkiopisto de Finlandia y les escueles de música de Charente (Francia).

Los conciertos van cellebrase güei a partir de les 20:00 hores na Casa de Cultura de Nava y la xornada de conferencies va tener llugar mañana nel Museu de la Sidra. Ente los conferenciantes que van intervenir mañana alcuentrense los profesores de los centros europeos que participaron nel programa “Entramus”. Enantes del entamu de la xornada de conferencies va presentase un llibru que repara el trabayu fechu durante estos tres años.

“Entramus” nació col oxetivu d’iguar un espaciu para que los paises participantes truquen les sos esperiencies acerca de la música tradicional dende un enfoque europeu. Tamien se quier fomentar la investigación nel campu de la música tradicional y de les sos metodoloxíes d’enseñanza y promover futuros planes d’estudiu que favorezcan l’aparecimientu de músicos tanto profesionales como aficionaos.