Portada Conceyos La “Reciella de la Factoría na rede” vuelve con tres nueves actividaes hasta xineru

La “Reciella de la Factoría na rede” vuelve con tres nueves actividaes hasta xineru

by redacción asturnews

La “Reciella de la Factoría na rede” sigue nel segundu semestre del añu cola programación de tres actividaes nueves pa tola familia, que se van poder siguir de forma telemática. La primera llegaba’l sábadu 27 de payares, cola emisión de  “Aventurina, l’ablana”, de Factoría Norte.

Organizada pola Estaya de la Llingua de la conceyalía de Cultura d’Avilés, pieslla’l so sestu añu con propuestes nueves y didáutiques per internet, con marionetes, muncha música y cuentacuentos. Una cada mes, hasta xineru.

El sábadu 18 dávientu, a les 11.00 hores, llega la segunda propuesta de la programación, “Nun me presta”, con Olga Cuervo. Un cuentacuentos mui especial, nel qu’a la protagonista nun-y presta ser princesa, nun-y presta  poner vistíos, nun-y presta que nun-y faigan casu…

Y pa lo último, col cambiu d’añu, el 8 de xineru de 2021 llega “Güelina”, d’Ana Morán. Un cuentacuentos nel qu’una güela máxica, que tien muchos años y casi venti nietos y nietes a quien-yos da cariñu inmensu. ¿Cómo ye que sigue teniendo tanta fuerza pa dalu?

Les propuestes son de baldre, pa tolos públicos y fuera del horariu escolar, y  podrán siguise per aciu de las redes sociales del Conceyu d’Avilés, na web de la Estaya de la Lingua (www.llinguaviles.com), na revista de la Fundación Municipal de Cultura (www.avilescultura.com) y na plataforma dixital PlayPresta.

A partir de la hora na que tán programaes (11.00 hores), podrán vese nel horariu y los díes que se desee.

Tamién te podria gustar