La Prueba d’Accesu a la Universidá va tener llugar n’Asturies los díes 7, 8 y 9 de xunu

La Prueba d’Accesu a la Universidá va tener llugar n’Asturies los díes 7, 8 y 9 de xunu
17 febreru 17:28 2017 Imprimir

La vicerrectora d’Estudiantes, Elisa Miguélez, anunció esti martes, demientres la so intervención nes Xornaes d’Orientación Universitaria que se desenvolvieron a lo llargo la selmana nel auditoriu del Palaciu d’Esposiciones y Congresos d’Uviéu, que les feches previstes pa la realización de la nueva PAU polos alumnos que concluyan 2º de Bachilleratu van ser los díes 7, 8 y 9 de xunu n’Asturies y la segunda convocatoria pa los díes 4, 5 y 6 de xunetu..

Los díes daos a conocer por Elisa Miguélez nes Xornaes d’Orientación Universitaria que se desenvolvieron a lo llargo la selmana nel Palaciu de Congresos d’Uviéu, cola presencia d’unos 2.000 estudiantes de Bachilleratu, nun foron la única novedá. La Vicerrectora d’Estudiantes tamién desplicó cómo va ser la nueva PAU.

Segun detalló, va estremase en dos fases. La primera ye obligatoria pa tolos estudiantes que quieran aportar a la Universidá y van esaminase de cuatro materies troncales cursaes mientres l’añu académicu: Hestoria d’España, Llingua Castellana y Lliteratura II, Primer Llingua Estranxera II (Inglés, Francés, Alemán, Italianu y Portugués) y la troncal xeneral de la modalidá de Bachilleratu, que serán Matemátiques II, Matemátiques Aplicaes a les Ciencies Sociales, Llatín II y Fundamentos del Arte II.

Cada materia va ser evaluada de 0 a 10 puntos y la media de toes elles tien que llegar al cuatro. Esta fase va tener un pesu 40 per cientu y va sumase a nota media de Bachilleratu, d’un 60 per cientu. La resultancia de dambes tendrá de superar el 5 y ye válidu pa universidaes públiques y privaes. Tien validez indefinida.

P’aquellos que quieran xubir nota, principalmente porque quieren aportar a carreres con llende d’accesu (numerus clausus) va esistir otra fase, pa consiguir cuatro punto más y llegar a una calificación máxima de 14 puntos. Van Poder esaminase d’hasta un máximu de cuatro materies y (esto entá ta pindiu del alcuerdu final de la comisión organizadora de la prueba) d’un mínimu d’una d’ente les 13 troncales d’opción que pueden ser cursaes o non demientres segundu de Bachilleratu.

La vicerrectora esclarió que l’alumnu tendrá d’especificar de qué va esamínase nel momentu de faer la matrícula. Nun va poder faelo in situ. Va Poder escoyer ente: Artes Escéniques, Bioloxía, Cultura Audiovisual II, Dibuxu Técnicu II, Diseñu, Economía de la Empresa, Física, Xeografía, Xeoloxía, Griegu II, Hestoria del Arte, Hestoria de la Filosofía y Química.

De los cuatro que s’esamine, van computase un máximu de dos, siempres superaes con un 5, qu’apurran la meyor nota d’almisión. Pa ello, van ser multiplicaes por un coeficiente de ponderación 0,1 o 0,2, yá establecíu poles mesmes facultaes de la Universidá d’Uviéu en función de les distintes asignatures. Amás d’esos dos, nesta fase va ser sopesada la troncal de modalidá de la que yá s’esaminó l’alumnu na fase d’accesu. Nun significa esto que tenga qu’esaminase dos veces, pero si que, con esti doble cálculu, podría llograr, ensin presentase a la prueba d’almisión, 12 puntos, por casu.

Entá asina, Miguélez cree más conveniente nun arriesgar y presentase a les troncales d’opción nesta fase. Nesti casu, la nota final sería la suma de la nota de Bachilleratu (60 per cientu), de la fase d’accesu (40 per cientu) y de los dos materies ponderaes que supongan, como se dicía, la meyor calificación pa l’almisión. Nesti casu, les calificaciones son válides solo por dos cursos: 2017-18 y 2018-19 (salvo regulación en contra).

Les ponderaciones de 0,1 y 0,2 son pa la Universidá d’Uviéu y pueden camudar n’otres instituciones académiques, polo que la vicerrectora pide pensar bien les materies de les qu’unu quier ser evaluáu p’aportar a la carrera qu’unu quier cursar.

  Categories: