Los próximos díes 2, 3 y 4 de xineru del 2008 va entamase n’Uviéu una nueva Xunta d’Escritores Asturianos que col lema “Lliteratura asturiana y compromisu” y dende Asturnews yá podemos ufrir el programa completu d’estos trés díes d’alcuentru. Estos alcuentros lliterarios tendrán llugar nel marcu de la Biblioteca del Campu San Francisco, nel Paséu del Bombé d’Uviéu, el mesmu sitiu onde se celebró otra Xunta d’Escritores va cerca de dos años col fin d’entamar una bienal de lliteratura asturiana “abierta a tol públicu en xeneral”.

Conferencies, ponencies y coloquios, amás de presentaciones de llibros y cuadros marquen la pauta d’esta nueva edición de la Xunta d’Escritores Asturianos. El miércoles 2 de xineru entamarán los alcuentros a les cinco la tarde cola presentación del llibru “El conceptu xeneracional. Actes de la Xunta d’Escritores Asturianos 2005” na que se recueyen les conferencies y comunicaciones de los participantes de l’anterior Xunta nun llibru editáu por Trabe. Tamién presentarán conferencies Carlos Rubiera, Xaviel Vilareyo, Bertu Ordiales y Helena Trexu, que falarán del compromisu de los escritores, del cine asturianu y de toponimia d’orixe botánicu.

Tamién esi mesmu día presentarán llibros Pablo Rodriguez Medina , Silvia Cosío y Bertu Álvarez Peña, amás de la presentación de cuadros de Violeta Sánchez. El xueves 3 de xineru tán programaes les conferencies de Xosé Lluis Campal y Xurde Morán, amás de presentaciones de llibros de Xuan Carlos Crespos y d’Esther García López. También habrá un recital poéticu cola presencia de diez autores la tercer xeneración del Surdimientu.

El vienres 4 de xineru, tamién a les 5 la tarde entamarán les comunicaciones de Marta Lozano, Inaciu Galán y González, Maite García y la escritora aragonesa Trinidad Ruiz, que falarán sobre la historia de la bandera asturiana, los monólogos, los aconceyamientos d’escritores asturianos y la edición n’España respectivamente.

La Xunta d’Escritores Asturianos pesllará esta edición cola presencia del poeta aragonés Ángel Guinda que vendrá a Uviéu especialmente pa presentar una conferencia sobre’l so mundu poéticu que precederá a la presentación n’Asturies d´ún de los sos últimos llibros tituláu “Tola lluz del mundu” que recueye los sos poemes nes seis llingues del Estáu español, editáu pola editorial aragonesa Olifante.

XUNTA D’ESCRITORES ASTURIANOS

UVIÉU – 2, 3, 4 xineru 2008

MIÉRCOLES 2 DE XINERU:

– 16,30h – Presentación de les xornaes de la Xunta d’Escritores Asturianos – Uvieu 2008. Inauguración de la esposición de pintura de Violeta Sánchez Trexu.

– 17h – Presentación del llibru El conceptu xeneracional, Actes de la Xunta d’Escritores Asturianos 2005 (Ediciones Trabe). Ensayos d’Ánxel Álvarez Llano, Pablo R. Medina, David Rivas, Humberto Gonzali, Chechu García, Ánxel Rodriguez, Helena Trexu, ente otros, y amuesa poetica.

– 17,30h – El compromisu del escritor asturianu más p´allá de lo estetico. Carlos Rubiera.

– 18h – Presentación del llibru Perreríes de Pablo R. Medina (Suburbia Ed.) cola intervención de Silvia Cosío.

– 18,30h – Cine asturianu: una hestoria de cien años. Xaviel Vilareyo.

– 19h – Toponimia d´orixe botánicu n´Asturies. Bertu Ordiales.

– 19,30 – Compromisu de xente ensin papeles. Helena Trexu.

– 20h – Presentación del llibru Mitos de Xixón, de Bertu Alvarez Peña (Ed. VTP) a cargu de Milio R. Cueto.

XUEVES 3 DE XINERU:

– 17,30 – Presentación n’Uvieu del llibru Lías, apendiz de contador d´hestories, de Xuan Carlos Crespos.

– 18h – Preocupaciones humanistes na poesía de Carlos García Velasco (1973-1975), Xose Lluis Campal.

– 18,30h – Diez años caleyando Asturies. Xurde Morán.

– 19h – Llingua y hestoria del Fueru de Zamora. Xaviel Vilareyo.

– 19,30 – Presentación de los llibros d´Esther García López Historias de vida ya señas de muerte (Madú Ediciones) y Faraguyas cola intervención de Cristian Velasco.

– 20h – Recital poeticu: Xurde Fernández, Llucía Fernández Marques, Chechu García, Elvira Laruelo, Marisa López Diz, Pablo Rodriguez Alonso, Pablo Rodríguez Medina, Xuan Santori, Susana Sela, Xaviel Vilareyo.

VIENRES 4 DE XINERU:

– 17h – Historia y signu de la bandera d’Asturies. Marta Lozano.

– 17,30 – Monólogu modernu: el compromisu d´un xeneru. Inaciu Galán y González.

– 18 – Apuntes sobre los aconceyamientos d´escritores. Maite García.

– 18,30 – Una institución pa les lletres asturianes. Humberto Gonzali.

– 19h – Olifante: una oferta de felicidad. Trinidad Ruiz Marcellán, directora de la Editorial Olifante, del Festival del Moncayo y de la Casa del Poeta de Trasmoz.

– 19,30h – Arquitexturas. Ángel Guinda.

– 20h – Presentación del llibru Tola lluz del mundu, d´Ángel Guinda (Editorial Olifante), primer poemariu sextillingüe del estáu hespañol, cola intervención de Trinidad Ruiz.

LLUGAR: BIBLIOTECA DEL CAMPU SAN FRANCISCO – PASÉU DEL BOMBÉ – UVIÉU