La primer edición de la Universidá Asturiana de Branu entama güei en Cangas

02 agostu 07:39 2010 Imprimir

A la una la tarde d’esti llunes, 2 d’agostu, el Salón d’Actos del Institutu de Cangas del Narcea va acoyer la inauguración de los Cursos y Actividaes Abiertes de la Universidá Asturiana de Branu (UABRA), un proyectu lleváu a cabu gracies a la collaboración ente l’Academia de la Llingua Asturiana, la Universidá d’Uviéu y el Conceyu de Cangas del Narcea. Nel actu intervendrán el Conseyeru d’Educación, José Luis Iglesias Riopedre, el Vicerrector d’Informática y Comunicaciones, Víctor Guillermo García, la Vicerrectora d’Estensión Universitaria, Cultura y Deportes, Covadonga Betegón, la Presidenta de l’Academia, Ana Cano; l’Alcalde del Conceyu de Cangas del Narcea, José Manuel Martínez González; y el Director de los Cursos, Xosé Antón González Riaño.

Los Cursos y xeres complementaries desarrollaránse ente los díes 2 y 13 d’agostu y nellos van participar al rodiu de 150 persones. Esti mesmu llunes, dientro de les Actividaes Abiertes d’esta edición de la UABRA, tendrá llugar la inauguración, a les 12:00 hores, de la esposición del artista Adolfo Manzano «pequeñes nubes nel cielu, nel xardín xuxurios» na Casa de Cultura “Palaciu Omaña” de la villa canguesa.

Conteníos

Los cursos más tradicionales, nivel básicu, avanzáu y capacitación pa torna, van siguir tando dientro de la Estensión Universitaria de la Universidá d’Uviéu, anque esti añu l’Academia pon especial interés na formación de los periodistes y profesionales de los medios de comunicación, acutando 10 places del cursu elemental pa periodistes n’activo o persones qu’amuesen una rellación profesional col ámbitu de la prensa.

El cursu básicu de llingua asturiana inclúi, con 60 hores llectives, un repás peles Normes ortografiques, la sociollingüística aplicada al casu asturianu, exercicios escritos, situaciones comunicatives escrites y orales, y un averamientu a la Lliteratura Asturiana.

Pela so parte, l’Avanzáu, col mesmu númberu d’hores, adiéntrase nel estudiu de la llingua asturiana estándar y la so presencia na sociedá de l’Asturies de güei, plantegando tamién situaciones comunicatives escrites y orales, más complexes, aspeutos de la cultura asturiana y de la Historia d’Asturies, un repás a la Lliteratura asturiana contemporánea y un pequeñu cursu de téuniques de creatividá lliteraria.

Más cursos d’afondamientu que nunca.

No que cinca a los Cursos d’Afondamientu Cultural y Llingüísticu, les novedaes son abondoses nesta ocasión. Como cada añu va celebrase un cursu de Capacitación pa la Traducción al Asturianu, de 35 hores, del 2 al 6 d’agostu, y embaxo la dirección de Xosé Lluis García Arias, y la collaboración de los profesores Ana Mª Cano y Xosé Antón González Riaño. Nel cursu preséntense los presupuestos teóricos que rixen la traducción a una llingua minoritaria, teniendo en cuenta, de mou especial, l’exerciciu de tornes de testos lliterarios y periodísticos y de testos llegales y científicos.

El cursu dedicáu a les nueves tecnoloxíes va ser esti añu “Internet y asturianu: aplicaciones socio-educatives”, va celebrase del 2 al 6 d’agostu, y nes sos 35 hores va sirvir pa ufiertar nueves y prestoses posibilidaes pa que’l profesoráu de Llingua Asturiana d’Educación Primaria y Secundaria pueda acceder a los recursos qu’ufre la rede y pueda diseñar, llueu, xeres y actividaes d’aula pal deprendizax oral y escritu de la Llingua Asturiana. El so coordinador ye David Guardado y nél inxértense tamién como profesores Xulio Berro y Xabiel García Pañeda.

Una de les novedaes más llamatives d’esta Universidá de Branu va ser el Cursu d’averamientu a la llocución periodística en llingua asturiana, que se celebra tamién del 2 al 6 d’agostu y que ta plantegáu col envís de que los periodistes y trabayadores de los medios de comunicación (o persones interesaes nel tema) cunten, dende una cierta conocencia llingüística, con ferramientes afechisques pa facer un primer averamientu a la llocución (radio y tv.) en llingua asturiana. El so coordinador ye Próspero Morán, director d’Asturnews y nél inxértense tamién otros profesores como Rubén Martín-Llames, Cristobla Ruitiña, presentador d’informativos en TPA y Sonia Avellaneda, conductora de programes de radio na RPA.

Sicasí, les novedaes nun terminen ehí, esti añu, y ente’l día 9 y el 13 d’agostu, van celebrase otros cursos nuevos, ye’l casu del de Cantares, bailles ya instrumentos musicales asturianos, empobináu por Xuacu Amieva, cola participación de Xosé Antón Fernández “Ambás”, Maribel Parrondo y Covadonga González Muñiz. Nel cursín va afondase nel conocimientu de los cantares, bailles ya instrumentos populares asturianos dende la perspeutiva de la so presencia na escuela. D’esti mou, trátense aspeutos de la presencia de bailles, cantares ya instrumentos na cultura tradicional y les fiestes populares, siempre col enclín d’amosar el so valir educativu.

Otru de los cursos entamaos pola ALLA va ser La lliteratura asturiana nel aula d’Educación Primaria, empobináu por Iris Díaz Trancho y cuntando con Pablo Rodríguez Medina y Xandru Armesto como profesores. Trátase d’un cursu que tien como oxetivu’l tratamientu de la lliteratura asturiana nel marcu de la Educación Primaria. Pa ello, propónense cuatro bloques de conteníos, dixebraos en «Lliteratura infantil y xuvenil n’asturianu», «Aprovechamientu didáuticu de los testos n’asturianu», «Aplicaciones interactives de la lliteratura en llingua asturiana» y «Creación lliteraria en llingua asturiana». Asina mesmo, esti cursu va cuntar con delles actividaes de calter complementariu.

Otros cursos bien importantes esti añu van ser el d’aniciu a la investigación dialeutal, toponímica y de tradición oral, dirixíu por García Arias, y empobináu especialmente a estudiantes y llicenciaos o espertos y especialistes en Filoloxía que quieran afondar nes téuniques rellacionaes colos trabayos de campu, encuestación y primeros pasos na investigación y descripción llingüística y na toponímica y na de la lliteratura oral; y el cursu d’entamu a la investigación hestórica de la llingua asturiana que dirixe Ana Mª Cano y nel que tamién participen, ente otros, como profesores José Ramón Morala, Clara E. Prieto y Xosé Lluis García Arias, afondando na conocencia de la hestoria esterna ya interna de la llingua asturiana y les carauterístiques del actual procesu de normalización.

Amás, y dientro del programa de formación de profesoráu en gallego-asturianu, celebráse la segunda fase del cursu, con práctica escrita y oral de gallego-asturiano, averamientu a la lliteratura actual y plantiamentos didácticos.

  Categories:
Loading Facebook Comments ...