La prevención de conductes adictives protagoniza en Xixón esti xueves les charres de Pumarín

Esti xueves, 3 de mayu, el Centru Municipal Integráu de Pumarín Xixón Sur va acoyer una xornada sobro la promoción de la salú y la prevención de conductes adictives dientro del programa de charres que se vien desenvolviendo nesti centru.

La investigación actual señala elementos de la redolada que se rellacionen con problemes per consumu de drogues o comportamientos adictivos: les condiciones materiales del barriu, la cohesión social, la publicidá esistente, la normativa y polítiques, l’accesibilidá a les drogues o a los comportamientos adictivos, les iniciatives culturales, les opciones pa esfrutar del tiempu llibre, l’accesu a la educación, etc. Los mesmos elementos que faciliten o enzanquen el bienestar y la calidá de vida. Non puede dixebrase la prevención de la promoción de la salú.

Y ye na ciudá, como llugar de convivencia, onde se desenvuelven toes estes actividaes que condicionen la vida de les persones, el so meyor o peor salú, el so prestu o insatisfaición.

El bienestar, la calidá de vida, l’equilibriu y prestu de les persones, ye muncho más un problema social qu’un trestornu individual. Les técniques persuasivas ya informatives que busquen influyir los comportamientos de les persones a nivel individual por que realicen conductes saludables, nun consuman xuna sustanza o nun s’atollen nun xuegu adictivu, son muncho menos efectives que camudar los determinantes sociales o contextuales.

De too esto va esta xornada, d’analizar los determinantes de la salú y el bienestar, d’analizar les polítiques preventives y d’escuchar a quien tienen capacidá d’influyir nes estratexes que podríen faer de la nuesa ciudá una redolada amigable, onde’l bienestar sía la opción más fácil.

Más información