La Presidenta de l’Academia refuga cualesquier intentu de galleguización del Eo-Navia “venga d’onde venga”

Énte les declaraciones del Presidente de la Xunta de Galicia en rellación col prouyeutu de que la señal de la televisión gallega algame l’occidente asturianu, la Presidenta de l’Academia de la Llingua Asturiana, afita delles cuestiones nun declaración escrita, qu’Asturnews ufre a los sos llectores.

Nuna sociedá moderna y democrática, onde nin se puede nin se debe tar al marxe de les nueves teunoloxíes de la información, nun se debería poner dengún tipu torga a la receición de dengún mediu de comunicación; nadie lo fairía dende una posición medianamente oxetiva y racional. Cuido que cuanto más bayurosa seya la ufierta, más posibilidaes d’escoyeta y de formación tendrá’l ciudadanu; y cuido tamién que l’intercambiu cultural ye siempres arriquecedor tanto pal individuu como pa la sociedá.

Otra cosa ye, como paez deducise de les declaraciones del Sr. Núñez Feijóo, espeyaes na prensa gallega y asturiana esti día, cuando tres esi mediu de comunicación del que falamos hai intereses de calter políticu; cuando la presencia de la televisión gallega nos conceyos más occidentales d’Asturies respuende a un intentu de galleguizar esta fastera; cuando se venceya a un plan de normalización llingüística, aprobáu per unanimidá pel Parllamentu de Galicia va unos años, pa ser aplicáu nun territoriu que ensin dulda de nengún tipu pertenez a Asturies.

Nós nun escaecemos que, ente les midíes recoyíes nel referíu Plan Xeral de Normalización da Lingua Galega que surdió de resultes del pautu de gobiernu ente’l Partíu Socialista de Galicia y el Bloque Nacionalista Galego de la llexislatura cabera, unes cuantes d’eses midíes diben empobinaes a la galleguización d’esti territoriu y que, xustamente, ente elles, taba la d’entamar conversaciones coles autoridaes polítiques d’Asturies pa qu’esta fastera recibiere una sintonía perfeuta de la rtvg.

Y too ello ye más grave cuando per parte d’Asturies nun esiste una contrapartida asemeyada, darréu que nun hai una tpa que esparda (nin n’asturianu nin en gallego-asturiano) dientro de la comunidá vecina la realidá cultural y llingüística de nueso.

Acordies colo anterior, y como yá afitamos delles vegaes, l’Academia refuga cualquier intentu, venga d’onde venga y seya del tipu que seya, de galleguización del territoriu asturianu del Navia-Eo. Pa nós el gallego-asturiano o eonaviego nun forma parte del denomáu “galego estremeiro” o “gallego exterior”.

Como ye bien sabío l’Academia reconoz el gallego-asturiano como la variedá llingüística propia d’esti territoriu, con entidá como llingua, qu’habrá ser oficial nel so ámbitu de mou paralelu a la oficialidá del asturianu en tol territoriu d’Asturies.

Arriendes d’ello, la normativización y normalización social del gallego-asturianu o eonaviego correspuende namái a l’Academia de la Llingua Asturiana, cimera institución llingüística del Principáu, y al propiu Gobiernu asturianu.

Nesti sen, encamentamos al Gobiernu d’Asturies que curie los derechos llingüísticos de tolos falantes asturianos y que tome les midíes afayadices pa que nun se produza ningún tipu d’espansionismu gallegu dientro de les llendes territoriales d’Asturies.

Sicasí somos sabedores de qu’urxe la reconocencia oficial de la llingua asturiana (y del gallego-asturiano o eonaviego). Namái asina se llogrará, ente otres coses, frayar los intentos del espansionismu gallegu de colonizar culturalmente Asturies.

L’Academia enxamás renunciará a l’asturianidá de los conceyos más occidentales del so territoriu y defenderá los derechos llingüísticos de la so xente col mesmu enfotu que defiende los del restu de los ciudadanos d’Asturies.