La presencia del asturianu nel 8 de Setiembre divide a los tres partíos que gobiernen el Principáu

02 setiembre 23:18 2004 Imprimir

Vagamar nel Gobiernu’l Principáu pol usu institucional de la llingua asturiana. L’ausencia del asturianu nes invitaciones y programes oficiales de los actos del 8 de Setiembre, que tendrán epicentru en Mieres, lleva a Izquierda Xunida a acusar de “contradictoriu” al Executivu del que forma parte, provoca’l distanciamientu del Bloque por Asturies y motiva la negación del PSOE, sociu mayoritariu nel Gobiernu, qu’anuncia publicidá institucional n’asturianu.

Asina lo aseguró ayeri en Mieres la conseyera de Cultura, Comunicación Social y Turismu, Ana Rosa Migoya, quien refugó’l comunicáu emitíu hores antes pol Bloque por Asturies -compañeru de los socialistes nel Executivu- nel qu’esta organización anunciaba’l so distanciamientu de les cellebraciones oficiales en Mieres en protesta pola ausencia institucional nelles de la llingua asturiana.

Güei toca-y el turnu a Izquierda Xunida, el tercer sociu de Gobiernu. Nuna nota pública, la coalición declárase esmolecida énte “les contradicciones del Gobiernu asturianu en tornu al compromisu cola normalización de la llingua asturiana” y acusa al Executivu -nel que ta presente al traviés de dos conseyeríes- de manifestar “despreciu” p’hacia l’idioma autóctonu “olvidando” la so presencia digna nos actos del 8 de Setiembre, un escaezu que n’opinión d’IX “ye reflexu d’una visión d’Asturies superficial y frívola”.

En consecuencia colo anterior, Izquierda Xunida d’Asturies saca pechu na defensa de la llingua asturiana y demánda-y al Gobiernu’l Principáu un progresivu incrementu del usu y visibilidá d’esti idioma nel planu institucional. Hasta tal puntu paez llegar el desalcuerdu, qu’IX y el Bloque cellebrarán la so propia fiesta del 8 de Setiembre nuna carpa allugada nel parque xixonés de Los Pericones, lloñe de Mieres.

Según fontes del Gobiernu autonómicu consultaes por Asturnews, l’asturianu tará parcialmente presente en ciertos aspectos de la propaganda institucional del Día d’Asturies, depués que l’Executivu recibiera un toque d’atención ‘in extremis’ sobro l’escaezu.

Primero, en castellán

El pasáu 20 d’agostu, el director xeneral de Deportes del Principáu, Daniel Gutiérrez Granda, dio a conocer en Xixón el programa oficial de los actos del Día d’Asturies, posando xunta un cartel promocional retuláu dafechu en castellán y facilitándo-yos a los medios de comunicación un programa d’actos confeccionáu nesa mesma llingua, con presencia del asturianu n’espresiones mui puntuales.

Por esa razón, y énte la falta d’invitaciones oficiales y programes en llingua asturiana pa promocionar los actos institucionales del 8 de Setiembre, el Bloque por Asturies emitió ayeri un comunicáu nel que se desmarca de les cellebraciones oficiales del Día d’Asturies y separa a los sos afiliaos qu’ostenten cargos públicos nel Gobiernu’l Principáu de les cellebraciones entamaes pol Executivu.

El Bloque llama l’atención, na so comunicación pública, sobro l’olvidu de la llingua asturiana “en publicaciones oficiales” y declara’l so llabor en defensa l’asturianu “prindáu” polos sos socios nel Executivu autonómicu, al tiempu que denuncia que l’actitú de los socialistes convierte en “papel moyao” el propiu alcuerdu de Gobiernu no que cinca a la protección y puxu del idioma asturianu dende l’Alministración autonómica.

  Categories:
Loading Facebook Comments ...