La prehistoria de la música aporta al Parque de La Campa Torres

by redacción asturnews | enero 16, 2018 10:34 am

Esti martes 16 de xineru, a les 12 hores, inaugurase la Esposición sobre la prehistoria de la música que va acoyer el Parque Arqueolóxicu-Natural de la Campa Torres hata’l 14 de febreru próximu.

La esposición trata l’orixe y distintos usos de dalgunos de los preseos musicales más antiguos creaos pol ser humanu, con una so sonoridá qu’ocupó probablemente un llugar prominente dientro de la vida cotidiana de los nuesos antepasaos más remotos.

Al traviés de l’arqueoloxía, la etnoloxía y de la musicoloxía comparada, sábese que la práctica totalidá de los preseos prehistóricos taben construyíos con materiales disponibles nel medioambiente. Nesta esposición van poder conocese dalgunos de los más representativos, como los raspadores de güesu, los sonaxeros construyíos con granes de diverses especies vexetales, los primeros tambores ( primero qu’empezaren a utilizase pieles enterriaes), les trompetes y megáfonos más primitivos (construyíos con caracoles o cuernos d’animales), el primer preséu de cuerda, y otros inxenios sonoros de manufactura rudimentaria.

Tratase d’oxetos de construcción o cambéu actual, nun son retruques, nin reproducciones, nin orixinales de preseos topaos en sitios arqueolóxicos. Sicasí, munchos d’estos exemplares vienen de manufactura artesanal, pos fueron ellaboraos por mano d’obra indíxena y siguen siendo utilizaos por cultures que caltienen un estrechu venceyu cola naturaleza.

La esposición encadármase en base a característiques organológicas, siguiendo la clasificación de Hornbostel-Sachs (1914), qu’estrema los preseos en cuatro grandes grupos: idiófonos, aerófonos, membranófonos y cordófonos. De toos ellos, los de mayor representación na amuesa son los idiófonos, siguíos de los aerófonos, pos dambos son los que constitúin el sustrato cultural más antiguu.

 

Source URL: http://asturnews.com/la-prehistoria-de-la-musica-amosase-nel-parque-de-la-campa-torres/