La población escolar nel Principáu baxó en 12.300 neños en 5 años

La población escolar nel Principáu baxó en 12.300 neños en 5 años
14 10:22 2017 Imprimir

La población asturiana n’edá escolarizable (de 0 a 24 años) menguó un 6% ente 2010 y 2015. Asina lo recueye l’informe Tao y situación del sistema educativu asturianu’, presentáu la fin de selmana pol presidente del Conseyu Escolar de la rexón, Alberto Muñoz, xuntu col conseyeru d’Educación, Genaro Alonso.

L’informe cinca al cursu 2014-2015, pos l’órganu trabaya “con datos zarraos, nunca con provisionales”. En términos absolutos, supon que, a la fin d’esi quinqueniu, la comunidá cuntaba con casi 12.300 estudiantes menos (12.279, esactamente). Esta evolución fai que’l Principáu tenga’l porcentaxe de población n’edá escolarizable más baxu de too el país (18,5% frente al 24,8% de media).

El tramu que rexistró un amenorgamientu mayor foi’l de 20-24 años, con 12.336 alumnos menos, siguíu de la franxa 15-19, con un retrocesu de 4.764, y el de 0-4, con una baxada de 923. Pela contra, hubo medríes en 5-9 (3.827) y en 10-14 años (1.917).

Dase la circunstancia de que nesta ocasión y per primer vegada’l Conseyu Escolar conclúi l’informe con una serie de propuestes y la primera que destacó’l so presidente foi la necesidá de baxar les ratios del númberu d’alumnos per aula -n’Infantil, 23 na pública y 25 na alcordada; 25 en Primaria y Secundaria y 30 en Bachilleratu, na actualidá-. Alonso señaló, sicasí, que ve «difícil» ameyorar eses ratios, pos, dixo, “yá tán per debaxo de lo que preceptúa la LOMCE y debaxo del promediu. Inclusive si tomamos en cuenta la nuesa singularidá de zona rural, la media ta en 18,5. Entiendo la reivindicación de que, a menor ratio, más calidá educativa y meyor convivencia, pero veo difícil ameyorales”, aportunó.

L’informe – «fundamentalmente descriptivu»- pon de manifiestu les fortaleces del sistema, pero tamién les debilidaes. Ente les primeres, dambos destacaron que la tasa d’abandonu tempranu (la población ente 18 y 24 años que nun acabó la ESO y nun sigue nengún tipu de formación) taba nel 16,8%, porcentaxe 3,2 puntos per debaxo de la media española (20%) y bien cercanu al oxetivu que se marcó la UE pa 2020: asitiar esi índiz nel 15%. Asturies ye más ambiciosa yá que quier baxar al 12%.

Les tases de idoneidá -el porcentaxe d’alumnáu que ta matriculáu nel cursu que-y correspuende, que nun repitió- «superen la media nacional». A los ocho años ye del 95,2%, a los diez, del 91,6%; a los dolce, del 87,2%; a los catorce, del 75,5% y a los quince, del 68,5%.

Tamién comentó Alberto Muñoz la bona posición d’Asturies tocantes a la tasa bruta de titulación nESO. Mide la relación de los que llogren el títulu, independientemente de la so edá, al respective de los alumnos de quince años, los escolarizaos en cuartu de la ESO. Y nesti aspeutu somos los primeros del país, con un 86,2%, y los segundos, por detrás del País Vascu, en Bachilleratu (64,4%) y en FP (34,2% en grau mediu y 38,9% en superior).

  Categories: