Portada Patrimoniu La plataforma Cellagú preséntase como foru de denuncia del estrozu patrimonial

La plataforma Cellagú preséntase como foru de denuncia del estrozu patrimonial

by asturnet

La plataforma Cellagú, un colectivu en defensa del patrimoniu hestóricu y etnográficu del país, presentóse esti xueves 26 nel Club Prensa Asturiana d’Uviéu después de que lo ficiera va unos díes cola so primer denuncia na mano. El colectivu pon como casu el recién estrozu del castru astur de Cabezón en L.lena, un espoliu más de los que se vienen faciendo de contino, afirmen los integrantes de Cellagú.

La plataforma llama l’atención sobre casos asemeyaos al del castru l.leniegu como la menacia d’una cantera de caolín a los túmolos de Penousén en Salas;el cercu por otra cantera del castru’l Picu’l Mancobiu, en Les Arriondes; la destrucción del castru de Castrovaselle en Tapia pa la construcción d’una esplotación agropecuaria; el deterioru de la necrópolis tumular de Monte Areo en Xixón, convertida “en vertedoriu”; la estroza d’un xacimientu paleolíticu en Perlora o la de los xacimientos arqueolóxicos de Balmonte por mor de la estración d’oru.

La plataforma Cellagú ta formada por un grupu d’especialistes en patrimoniu etnográficu -al frente de los cualos ta l’investigador Berto Álvarez Peña- arqueólogos, biólogos y simples ciudadanos esmolecíos pol destin d’unos bienes d’interés cultural davezu abandonaos poles administraciones, como denuncia’l colectivu, qu’acusa a los conceyos de vulnerar les sos propies cartes arqueolóxiques en casos de concesiones de permisos colos que s’espolien xacimientos o a la Conseyería de Cultura, a la qu’acusen de pasividá y permitir estrozos irreparables. Cellagú pidió la dimisión de los principales responsables del departamentu autonómicu, el director xeneral de Promoción Cultural Carlos Madera y la mesma conseyera Ana Rosa Migoya, pola so responsabilidá nos fechos que denuncien los conservacionistes.

Tamién te podria gustar