La pita de la Xunta vuelve presentase nun convite con Areces

27 mayu 03:48 2008 Imprimir

Na tarde d’ayeri llunes, el perconocíu “héroe mazcaritáu” comu lo noma la organización asturiana, “La Pita de la Xunta”, volvió a protagonizar una de les sos acciones reivindicatives. Inauguraba’l presidente Areces, “l’autoproclamáu enemigu de la oficialidá de la llingua asturiana” sigún la Xunta, una esposición na sala que tien el Banco Herrero n’Uviéu. Un grupu de militantes de la Xunta pola Defensa de la Llingua Asturiana que llevaben pancartes de mano con frases del estilu “Esti gobiernu marxina y reprime la llingua asturiana” aconceyóse delantre la sala y empezó a glayar “L’asturianu, llingua oficial”. Nesi momentu, de secute, apaeció “La Pita” ensin que naide la esperare y muncho menos el presidente Vicente Areces. La xente que pasaba pela cai comentaba coses como “Meca, mira, ahí ta la famosa Pita” o dicía frases d’ánimu, como una muyer vecina de la mesma cai: “Faceis mui bien en lluchar por esto porque nun podemos dexar que muerra la nuestra llingua”. Sigún la Xunta, “lo pior vieno cuando unos axentes del orde empezaron a identificar a los militantes de la Xunta, como siempre, de males maneres, cuando lo único que se taba faciendo yera exercer el derechu democráticu de la llibertá d’espresión”. Enantes de marchar, “La Pita” declaró que “va siguir persiguiendo al presidente a tolos convites, inauguraciones y fartures onde tea presente” y añadió que “mientres l’asturianu nun seya oficial el presidente nun va poder dormir a gustu”.

Dende la Xunta quier facese un llamáu a la ciudadanía d’Asturies pa que faiga rescamplar el sentir mayoritariu en favor de la oficialidá del idioma nun momentu enforma crucial pa la situación llegal del asturianu. Mentanto, la Xunta va llevar a “La Pita” tres del presidente Areces pa que nun se-y escaeza que l’asturianu ye cosa de toos y toes y que los derechos llingüísticos son inalienables.

  Categories:
Loading Facebook Comments ...