Portada Uncategorized La OSPA celebra esti xueves 25 años

La OSPA celebra esti xueves 25 años

by redacción asturnews

El ciclu Música n’escena trai esti xueves 15 aa Avilés el primeru de los conciertos de la temporada de la Orquesta Sinfónica del Principáu d’Asturies, con dellos estrenos y una repasada a la hestoria de la institución musical.

L’Auditoriu de la Casa de Cultura acueye esti xueves, 15 d’ochobre, a les 20:15 hores, el primeru de los conciertos programaos dientro de la sección Música n’escena de la temporada ochobre-avientu’15 de escenAvilés. Los encargaos d’inaugurar esti ciclu d’actuaciones van ser los músicos de la Orquesta Sinfónica del Principáu d’Asturies, que celebren n’anguaño’l so 25 aniversariu.

La OSPA empecipia n’Avilés la so temporada 15/16 col estrenu mundial de “Reflexos”, que’l compositor Marcos Fernández Barreru regaló a la sinfónica d’Asturies y al so director titular, Rossen Milanov. Esta pieza, creada pol autor d’orixe asturianu tres una visita a los Llagos de Cuadonga, va ser unu de los 25 Estrenos OSPA, obres que la orquesta va tocar per primer vegada n’España o’l mundu, y tamién títulos inéditos nel repertoriu de la orquesta.

Empobinaos pol maestru Rossen Milanov, director titular de la OSPA, van cuntar cola participación como solista del concertino de la orquesta, Alexander Vasiliev, que va ser el filo conductor d’un conxuntu d’artistes qu’a lo llargo d’un cuartu de sieglu integraron la OSPA.

Les localidaes pueden adquirise al preciu únicu de 18 euros nes taquilles de la Casa de Cultura, n’horariu de 11:00 a 14:00 hores, de llunes a sábadu, y de 18:00 a 21:00 hores de llunes a vienres. El programa del conciertu va incluyir l’estrenu mundial de “Reflexos”, de M. Fernández Barreru, “Escenes asturianes”, de B. Lauret, el Conciertu pa violín nº 2 en sol menor, de S. Prokofiev, y la Sinfonía nel mio bemol, de P. Hindemith.

Tamién te podria gustar