La organización moza Darréu asoleya la revista “Irguite”

09 abril 23:19 2006 Imprimir

Darreu, la organización de mocedá referente d’Andecha Astur, presentó’l pasáu sábadu día 8 “Irguite”, una revista a la qu’esta agrupación presentó como’l nuevu «voceru nacional», dende’l que van dar anuncia de les sos actividaes, asina como a ufiertar conteníos mesmo políticos que culturales.

El primer númberu d’esta espublización, que correspuende a los meses xineru-abril, cunta con diez páxines nes que se puede atopar una pequeña esbilla de semeyes; un repasu hestóricu de la organización y de les sos actividaes, como’l Día de la Muyer Trabayadora; asina como una entrevista col responsable de la estaya d’internacional de la organización moza andaluza “Jaleo!”.

Nes secciones “Mecigayu” y “Puestu de Material”, repártese información sobre cultura asturiana, música, llibros ya internet, asina como de los materiales que suel vender esta organización moza.

Irguite naz con una tirada de mil exemplares que van distribuyise de baldre per diferentes locales, tiendes, chigres y biblioteques, amás de repartise nes diferentes movilizaciones qu’organice la organización.

  Categories:
Loading Facebook Comments ...