La ONU galardona a la plataforma de participación del Conceyu d’Uviéu

La ONU galardona a la plataforma de participación del Conceyu d’Uviéu
11 xunu 13:30 2018 Imprimir

La ONU vieno acabante galardonar a la plataforma de participación del Conceyu d’Uviéu col Premiu al Serviciu Públicu 2018 por encarar el retu de “establecer modelos de gobernanza más abiertos, tresparentes, participativos ya inclusivos”.

La capital asturiana ye la segunda ciudá n’utilizar el sistema CONSUL, diseñáu pol Conceyu de Madrid. La organización reconoz que facilite a la ciudadanía plantegar idees y necesidaes “de forma directa” y participar en decisiones sobro los servicios públicos.

La plataforma de participación ciudadana CONSUL, un sistema diseñáu pol Conceyu de Madrid y que’l Conceyu d’Uviéu foi’l segundu gobiernu n’utilizar, recibió’l Premiu al Serviciu Públicu de la ONU na so edición 2018 por encarar el retu de “establecer modelos de gobernanza más abiertos, tresparentes, participativos ya inclusivos”. La plataforma foi’l proyectu européu ganador nuna edición de los premios de Naciones Xuníes que se centra en cómo tresformar la gobernanza p’algamar los Oxetivos de Desenvolvimientu Sostenible (ODS). La reconocencia llogróse, concretamente, na categoría “Faer que les instituciones sían inclusives y garanticen la participación en tomar de decisiones”, a la que se presentaron un total de 111 candidatures de tol mundu. La ONU escoyó esti proyectu por facilitar que la ciudadanía pueda plantegar idees y necesidaes “de forma directa” y por poner a la so disposición los servicios públicos por que se lleven a cabu.

El premiu, vixente dende 2003, ta promovíu pol Departamentu d’Economía y Asuntos Sociales de la ONU, col oxetivu d’atopar proyectos innovadores de gobernanza y alministración pública. Pa l’actual edición recibió 437 candidatures de 79 países y el Conceyu de Madrid ye xuna de les ocho instituciones públiques escoyíes como ganadores de los Premios de Serviciu Públicu 2018. Representantes de la Área de Participación Ciudadana, Tresparencia y Gobiernu Abiertu del dichu consistoriu van allegase a recoyer el premiu a la ceremonia que va tener llugar del 21 al 23 de xunu en Marrakech (Marruecos), coincidiendo col Día del Serviciu Públicu de les Naciones Xuníes.

La plataforma, que ta basada nel software llibre de códigu abiertu desenvueltu pol Conceyu de Madrid, CONSUL, amás de dexar la participación de la ciudadanía madrilana, estendió’l so usu, de primeres, al Conceyu d’Uviéu pa depués ser utilizada por 78 gobiernos de distintes ciudaes en 16 países a lo llargo de too el mundu. Ente ellos tán los de París, Turín, Bonos Aires, Quito, Llima, La Paz o Montevideo, ente otros. Amás, el Gobiernu d’Uruguai utiliza CONSUL a nivel nacional pa desenvolver el so plan de gobiernu abiertu.

  Categories: