La oficialidá protagoniza l’entamu la programación de xunu de Cauce Nalón

L’Asociación Cauce del Nalón entama’l so programa d’actividaes d’esti mes de xunu con una conferencia del presidente de l’Academia de la Llingua sobro la oficialidá na Casa de la Buelga.

Esti vienres, día 1 de xunu, a les 20 hores, na Casa de la Buelga (Ciañu), una conferencia de Xosé Antón González Riañu, presidente de l’Academia de la Llingua Asturiana, sobre “Llingua asturiana: la oficialidá qu’Asturies precisa” va abrir la programación d’esti mes de xunu de l’Asociación Cauce del Nalón.

El vienres, día 8 de xunu, a les 19,30 hores, na Casa de la Cultura “Alberto Vega”, de La Felguera, tendrá llugar la presentación y entrega de los Premios “Alberto Vega” de Poesía, de les Cuenques Mineres, cola presencia del alcalde de Llangréu y  de los miembros del xuráu y de Paula, vilba d’Alberto.

El vienres, día 15 de xunu, a les 20 hores, na Casa de la Buelga (Ciañu) tamién, la charra va ser sobro “La importancia del estudiu de la enseñanza musical al traviés de 35 años d’hestoria del Conservatorio del Valle del Nalón”. La charra fadrase colos ponentes Amparo Antuña Asenjo, directora del Conservatorio del Valle del Nalón, y María del Pilar Hernández Nanclares, profesora del Conservatorio y coordinadora del Proyectu Voblana. Esti actu va clausurar cola actuación del alumnáu del citáu centru.

Pa finar, el vienres, día 22 de xunu, a les 20 hores, nel Teatru d’El Apurro, tendrá llugar la presentación del videoclip “Vientu”, sol títulu “Dimi si tu nun yes vientu”, que fala de la condición del ser humanu como emigrante y abelugáu a lo llargo de distintes dómines y países. El ompositor ye Julio Arbesú y la cantante Celina Jiménez, valenciana afincada en Berlín. L’actividá faise cola participación d’intérpretes del grupu Refaxu coordinaos pola directora teatral Aurora Suárez Carrio.

Per otra parte, los socios y amigos de Cauce del nalón tienen el sábadu, día 23 de xunu la comida añal que va Ser nel Salón de les Espichas de Langrehotel, en La Felguera (el mesmu llugar que l’añu pasáu), a partir de les dos .