La oficialidá del asturianu nun implica que vaya a ser obligatoriu nes escueles

by redacción asturnews | noviembre 10, 2017 9:52 am

La Xunta pola Defensa de la Llingua ya Iniciativa pol Asturianu encamienten al grupu socialista a «siguir la llínea que marca la FSA» y dexen afitao que la oficialidá del asturianu nun implica que vaya a ser obligatoriu nes escueles.

Les asociaciones que trabayen pol caltenimientu del asturianu, que vienen años pidiendo la oficialidá, amuésense esperanzaos nel nuevu escenariu que se abre n’Asturies, y llamenten qu’haya entá quien «trate d’intoxicar a la opinión pública con argumentos que nun tienen sentíu».

Carlos Pulgar, cabezaleru de la Xunta pola Defensa de la Llingua, recordaba nesti sen a lo llargo la selmana que «nun hai nenguna llingua cooficial n’España qu’haya obligatoriedá d’aprender, lo que recueyen les comunidaes con llingua propia ye’l derechu a poder conocela». Asina, esplicaba, hai distintos modelos para la promoción de la llingua «en función de les necesidaes y realidaes sociales de cada llugar». Nel casu del euskera, por casu, en País Vascu y parte de Navarra, «hai un modelu combináu. Puede escoyese una enseñanza col euskera como llingua vehicular, otra col castellán solu o delles combinaciones graduales de dambes víes». En Valencia, Galicia o Mallorca úsense tamién modelos asemeyaos. Ye’l catalán onde sí s’aprobó un modelu inmersivo, nel que «toos tienen que cursar asignatures en catalán». En tolos casos, los ciudadanos tienen non solo’l derechu sinón tamién el deber de conocer el castellán, la llingua común.

Recuerda Pulgar que la cooficialidá del asturianu «solo sería una reconocencia xurídica, que nun trai nenguna aplicación automática y nun ye nengún botón coloráu». Y que cualquier aplicación práctica sobro la llingua, como la so presencia nel sistema educativu, los medios públicos o na Alministración, afitaríase cola llei de normalización que la desenvolviera.

Dende Iniciativa pol Asturianu, Inaciu Galán intervenía tamién al débalu y dicía creyer que «esti ye’l momentu más interesanet nos postreros 20 años». El so oxetivu ye «crear un consensu que dexe modificar l’estatutu ya incluyir la oficialidá. Creemos que’l sofitu social ye bien ampliu y nesi contestu, viendo qu’hai un consensu políticu, porque sumando a la FSA habrá xuna mayoría favorable».

Na so opinión, el grupu parlamentariu socialista «tendría d’atender a los mandatos que fixo la FSA que ye poner en marcha la oficialidá al traviés d’una reforma del estututo d’autonomía».

Source URL: http://asturnews.com/la-oficialida-del-asturianu-nun-implica-que-vaya-a-ser-obligatoriu-nes-escueles/