La OCDE sollerta a España de la fienda de xéneru en carreres tecnolóxiques

La OCDE sollerta a España de la fienda de xéneru en carreres tecnolóxiques
20 setiembre 08:45 2017 Imprimir

La fienda de xéneru na universidá española punxo n’alerta a la Organización pa la Cooperación y el Desenvolvimientu Económicu (OCDE) qu’avisa a España de que la proporción de muyeres qu’escueye carreres rellacionaes coles tecnoloxíes de la información y la comunicación ye solo del 12%, frente al 19% nel conxuntu de países que formen esti club económicu.

Y esti nun ye un asuntu menor: la OCDE recuerda que los estudios cimeros de Ciencies, Tecnoloxía, Inxeniería y Matemátiques son clave pa la crecedera económica d’un país y pa la so innovación, amás d’apurrir a quien los tienen unos ingresos mayores que los d’otres carreres.

“Les autoridaes españoles tienen de marcase como oxetivu amenorgar la fienda de xéneru por aciu servicios d’orientación ya información qu’aseguren la igualdá d’oportunidaes ente homes y muyeres  a la d’escoyer una área d’estudiu”, apunta la OCDE nel so informe ‘Panorama de la Educación 2017’, nel que s’analiza la educación en 46 países, 35 de la OCDE y once asociaos.

Otra manera, la entidá económica cree que la presencia de les muyeres ye «desproporcionada» en carreres rellacionaes cola educación (79%) y cola salú y el bienestar (72%), anque nesti casu, dambos porcentaxes son similares a los del conxuntu de la OCDE.

L’estudiu, presentáu la selmana pasada, dexa lluces y solombres pa la educación española. Ente les primeres, l’amenorgamientu de la tasa d’abandonu escolar, el descensu de ciudadanos que solo cunten con estudios básicos y el fechu de que n’España hai más graduaos y doctoraos en ciencies que la media europea.

  Categories: