La nueva edición de CaleyAvilés ufre esti branu tres visites guiaes n’asturianu

Otru añu más, la Estaya de la Llingua d’Avilés entama’l ciclu de visites guiaes CaleyAvilés, pa que les persones participantes puedan descubrir caleyando y en llingua asturiana dalgunos de los requexos más emblemáticos de la ciudá. El programa tien tres visites guiaes, de baldre, un vienres al mes, ente xunetu y setiembre, a cargu de Denis Soria Fernández, guía oficial del Principáu d’Asturies.

Nes visites, que son de baldre, podrán participar como muncho 15 persones, que tendrán d’apuntase primero y usar mázcara. Neños y neñes tamién podrán dir, pero siempre cola compañía d’una persona adulta. La reserva de places pue facese pel teléfonu llamando al 985 545 508, mandando un whasap al 634 821 613 o escribiendo un corréu electrónicu a estayallingua@aviles.es

La primer actividá del añu  llevará a los y les participantes a conocer el Cementeriu La Carriona. Sedrá’l 24 de xunetu a les 19.00 hores y nella va afondase na historia d’esti espaciu diseñáu a lo cabero’l sieglu XIX pol arquiteutu Ricardo Marcos Bausá. La so gran importancia histórico-artística llevólu a tar dientro de l’ASCE (Association of Signicant Cementeries in Europe). El puntu d’alcuentru sedrá la entrada al Centru d’Interpretación del Cementeriu La Carriona.

N’agostu, el vienres 21, sedrá’l momentu d’afondar pa conocer el Cascu Históricu. La visita guiada entamará a les 19:00 hores y el puntu d’alcuentru va ser la Plaza España, delantre la Casa Conceyu.

Pa terminar, el 18 de setiembre, a les 19.00 hores, la visita ye al Barriu de Llaranes entrando na historia d’esti conxuntu arquiteutónicu creáu nos años 50 pola empresa siderúrxica ENSIDESA p’agospiar a los trabayadores que llegaben a trabayar a Avilés coles sos families. El puntu d’alcuentru sedrá la Plaza Mayor de Llaranes, delantre’l reló.

Calendariu de visites

• Vienres, 24 de xunetu, 19.00 hores. Cementeriu La Carriona. Puntu d’alcuentru: entrada al Centru d’Interpretación del cementeriu  La Carriona
• Vienres, 21 d’agostu, 19.00 hores. Cascu históricu. Puntu d’alcuentru: Plaza  España, delantre la Casa Conceyu
• Vienres, 18 de setiembre, 19.00 hores. Barriu de Llaranes. Puntu d’alcuentru: Plaza Mayor de Llaranes, delantre’l reló