Portada Escéniques La Nueche en danza d’Uviéu aporta’l sábadu a la plaza de Trascorrales

La Nueche en danza d’Uviéu aporta’l sábadu a la plaza de Trascorrales

by redacción asturnews

La Nueche en danza d’Uviéu aporta’l sábadu a la plaza de Trascorrales con un programa que va entamar a les 19 hores con un taller gratuitu de baille tradicional, impartíu por Paulino Santirso, director de Xeitu, unu de los grupos participantes. L’amuesa, abierta al públicu, va empezar a les 22 hores.

El conceyal de Turismu y Economía, Rubén Rosón presentó esta selmana, en rueda de prensa, la “Nueche en danza”, que se va celebrar esti sábadu, a partir de les 22 hores, na plaza de Trascorrales. El conceyal tuvo acompañáu de dos de los organizadores, Paulino Santirso y Ramses Iglesias.

“Uviéu va tener esti sábadu la so I Nueche en Danza entá siendo un programa que lleva cuatro años dinamizando les nueches de los conceyos asturianos. Agora tenemos la oportunidá de vencer Trascorrales para sopelexar los bailles y cantares tradicionales, en definitiva lo que nos define como pueblu. Esto yá lo faíen los nuesos antepasaos cuando queríen prestase. Estimo a tol equipu’l fechu d’entamar esta nueche”, esplicó Rosón.

“La cita, a la que ta prevista l’asistencia de cientos de participantes, ye d’entrada llibre porque se trata d’eso, d’amosar la cultura tradicional asturiana que ye no que trabayamos. Decidimos faer daqué que fuera visible para’l públicu. Llevábamos yá cuatro años y esta ye la XVII Nueche en Danza que faemos. Asina que gracies al Conceyu d’Uviéu, porque ye la primer vegada que lo faemos equí, na capital. Los que nun sepan baillar van poder venir a un taller gratuitu para aprender nociones básiques y esfrutar de la nueche, na que tolos preseos son tradicionales y tola música en directu”, señaló Santirso.

Ramses Iglesias recordó que la nacencia de “nueches como ésta vien d’una corriente de Centroeuropa de revitalización del baille, que data yá de los 70. Primero llegó a Galicia, Madrid, Cataluña y esti tipu d’actividaes, viendo l’acoyida neses zones, decidimos echales a andar equí para sopelexar la cultura tradicional como patrimoniu del pueblu asturianu”.

Tamién te podria gustar