Portada Conceyos La Nueche Blanca d’Avilés saca a la cai’l so cartelu col lema ” Nun te quedes en blancu”

La Nueche Blanca d’Avilés saca a la cai’l so cartelu col lema ” Nun te quedes en blancu”

by redacción asturnews

La Nueche Blanca 2020 d’Avilés saca a la cai’l so cartelu col lema ” Nun te quedes en blancu, deamos color a la cultura” y abre la participación en redes sociales al traviés de la cuenta de Instagram @factoriaculturalaviles. y de la etiqueta #nocheblanca2020.

La cita cultural que cada añu enllena les cais d’Avilés de propuestes artístiques tenía previstu celebrase anguaño’l vienres 29 de mayu, pero nun va poder celebrase nesti 2020 la que fuera la so décima edición, prevista pal vienres 29 de mayu. Sicasí, l’eventu que cada añu entama la Factoría Cultural volverá tar presente nes cais avilesines gracies a l’espardimientu, na citada fecha, del cartelu que para esta ocasión diseñara l’artista uvieina Tania Blanco.

“Nun te quedes en blancu, deamos color a la cultura” ye’l lema qu’acompaña al cartelu que va ser distribuyíu per espacios públicos y establecimientos privaos de la ciudá. Con esta acción, la organización de la Nueche Blanca busca tar presente na sociedá avilesina nun añu difícil en tolos ámbitos, tamién nel d’una cultura que se reveló más necesaria que nunca.

En palabres de la conceyala de Cultura, Yolanda Alonso, “nun queríamos que la Nueche Blanca quedar en blancu, colo que la imaxe que fuera diseñada por Tania Blanco va salir a la cai nesa fecha dando presencia a esti proyectu cultural qu’adulces, edición a edición, foi creciendo cada añu”.

Xuntu col espardimientu del cartelu, la Factoría Cultural quier que la Nueche Blanca 2020 tea tamién presente nes redes sociales. Con ese oxetivu anima a toles persones que quieran celebrar esta cita dende casa compartiendo semeyes o vídeos en Instagram, utilizando’l hashtag #nocheblanca2020 y etiquetando en dicha publicación a la cuenta @factoriaculturalaviles..

Tamién te podria gustar