La Nueche Blanca apuesta n’Uviéu pola vanguardia artística internacional

La gran fiesta de la cultura n’Uviéu esti sábadu 6 va acoyer 58 actividaes en 46 localizaciones. Archifon VI reinterpretará los oxetos arquitectónicos de la Basílica de San Juan por aciu proyecciones, lluz y soníu. Tomáš Dvorák, Dan Gregor, Ondrej Prucha, John Gerrard, Vicki Bennett y Reynold Reynolds son dalgunos de los artistes internacionales que les sos obres van centrar la programación contemporanea.

El Presidente de la Fundación Municipal de Cultura, Roberto Sánchez Ramos, presentó hai poco la sesta edición de la Nueche Blanca, de la qu’Uviéu va esfrutar el próximu sábadu, 6 d’ochobre. Entamada pola Fundación Municipal de Cultura del Conceyu d’Uviéu y coordinada por José Castellanu, el festival de 2018 ta enfocáu a que los uvieinos vivan la ciudá d’una manera distinta per una nueche, averándo-yos  la creación artística contemporanea, con una especial apueste pola vanguardia internacional, con actividaes como Archifo VI, Western Flag, People Like Us y pieces audiovisuales de Reynold Reynolds. Los teatros Campoamor y Filarmónica, l’Auditoriu Príncipe Felipe, la Fábrica d’Armes, la Catedral o la Basílica de San Juan el Real son dalgunes de les 46 localizaciones de la ciudá que van acoyer les 58 actividaes que engloba la Nueche Blanca 2018, que va empezar a les 17:00 hores y va rematar a les 03:00.

La Basílica de San Juan el Real abre per primer vegada les sos puertes mientres la Nueche Blanca y failo cola actividá Archifon VI, de los artistes checos Tomáš Dvorák, Dan Gregor y Ondrej Prucha. L’interior del templu foi mapeáu virtualmente con detalles de la so arquitectura y ornamientos que s’activen provocando soníos y efectos visuales. D’esta manera los oxetos arquitectónicos son reinterpretados por aciu una capa virtual qu’emplega proyecciones, lluz y soníu. Los visitantes van poder interactuar cola instalación utilizando punteros llumínicos para faer que los detalles arquitectónicos allúmense y resonen armónicamente. Archifon VI ye un proyectu de LEV Festival / LEVent.

La Fábrica d’Armes va acoyer trés actividaes. Per una parte, el públicu va poder almirar Western Flag x John Gerrard, una instalación d’esti artista irlandés que tien una llarga trayectoria internacional. Tratase d’una pieza de simulación en tiempu real del territoriu nel que s’allugó’l primer pozu de petróleu de los Estaos Xuníos, na localidá de Spindletop (Texas), realizada en streaming dende Viena, onde l’artista tien el so estudiu. Ye la primer ocasión que Western Flag se exibe n’España.

Otra de les actividaes que se va desenvolver en La Vega va ser Celuloide oblicuu, que se va averar al cine al traviés de trés ufiertes: un espectáculu d’improvisación poética (Combate de lliteratura potencial), la proyección d’El home y la bestia (1920), protagonizada pol  míticu John Barrymore, cola actriz Ana Blanco de narradora y, a lo último, Radioteatro en vivu con Sherlock Holmes nel casu d’El valle del terror.

La Fábrica d’Armes va acovecer tamién la segunda edición de Nueves Formes: danza, visuales, performance, música ya ilustración. El públicu va esperimentar nueves víes artístiques y l’unión de distintes disciplines. Púlsar xune a Javier Martín con Luis Casanova; Comandu psicográfico venceya a Pablo Gallu y Iago Alvite, y Territoire funde la música d’Olivier Arson y Tasio.

La Filarmónica va acoyer People Like Us, de l’artista británica Vicki Bennett, quien trabaya nel campu del colax audiovisual y ye una de les pioneres y de les figures más influentes de la área del sampleo, l’apropiación y el found footage. N’Uviéu, Bennet va ufiertanos una performance especial na que fai un resume de los meyores momentos de la so carrera, que les sos obres ver na Tate Modern, Whitechapel Gallegy, The Barbican y el Sonar.

La imaxe sonora ye una instalación audiovisual inmersiva construyida en redol a una pieza creada pol director norteamericanu Reynold Reynolds y la so correspondiente banda sonora compuesta para la ocasión pela banda asturiana Galgu. Les pieces son proxectaes simultáneamente en 6 espacios distintos de l’antigua estación d’El Carboneru.

Nel Campoamor van celebrase los 100 años de Leonard Bernstein. Los pianos de Julio César Picos y de Jacobo de Miguel, y un elencu de cantantes de primer orde, integráu pola soprano Sara Blanch, el barítonu Pablo López, el tenor Juan de Dios Mateos, la soprano Maite del Cal y la mezzosoprano Ana Belén Llión, propónennos un viaxe polo más selecto de la producción d’esti compositor, dende lo más conocío, como pieces de West Side Story, hasta delles de les xemes menos frecuentes del so repertoriu.

Nel Auditoriu Príncipe Felipe va celebrase una conxusta d’altor: Arturo Pérez Reverte, Antonio Lucas y Edu Galán: L’amistá. Los trés son amigos dende va tiempu y, de xemes en cuando, queden a comer. Pa la Nueche Blanca treslladen la sobremesa a la sala principal del Auditoriu para compartir les sos esperiencies, les sos diverses ideoloxíes y les sos diverses opiniones.

Tamién nel Auditoriu Príncipe Felipe, na Sala de Cámara, el músicu Daniel Pinteño y la baillarina Dana Raz xunen fuerces en Tesela, Pieces For a Life, un espectáculu que tien como nexu d’unión la música barroca de François Coupertin, fundida cola danza contemporanea interpretada pola compañía de la baillarina israelina.

Sanar Uviéu va siguir l’actividá desenvuelta con gran ésitu nes ediciones de 2014 y 2017 con Cuentos bisbisaos. Cinco narradores (Paula Alonso, Teresa Denisse, Maikel Leiva, Borja Roces y Ana Laura Folles) van cuntar, van cantar o van recitar al escuchu lo que los participantes cuntárenlu: dende una emoción hasta una pequena esperiencia, que van ser devueltes al escuchu, namá para cada persona. Esta va ser una de les trés actividaes que van tener llugar nel Edificiu Históricu de la Universidá.

Leonard Cohen, el Kafka del blues va protagonizar l’actividá plantegada na Aula Magna. Va Ser un acercamientu a esti poeta y músicu con una conferencia de Belén Suárez Prieto, y dellos blues escritos pol maestru canadiense, de la mano de los músicos Álvaro Bárcena y Juan Flores.

L’arte completa la ufierta na Universidá. Mabel Llavandera, ente la creación y el compromisu amuesa la obra d’una artista que reflexa la nuesa  actualidá, complexa, cambiante y ensin fronteres, capaz d’actualizase costantemente, que fuxe de clixés y que supo compatibilizar el so apueste pol trabayu gráficu col de pintora de caballete.

Paco Cao, artista uvieín afincáu en Nueva York, preséntanos nel Salón d’Actos del Institutu Alfonso II un cómic tituláu Arte político para niñxs, que supon un acercamientu críticu a asunto socio-políticos qu’esmolecen a artistes contemporaneos, talmente que, amás de reparar en cuestiones significatives tocantes a obres d’arte coetaneu, señala debilidaes, incoherencies y contradicciones de les mesmes o de la práctica profesional de los sos ceadores. La publicación va partir por tola ciudá mientres la Nueche Blanca.

El Colexu d’Arquiteutos va esibir Bernardo Sanjurjo, l’aventura del color, un documental sobro’l procesu de creación d’estampes serigráficas del pintor asturianu, unu de los más influyentes del panorama artísticu actual n’Asturies.

El Muséu de Belles Artes va agospiar el maratón de grabáu Cuatro artistes y un muséu, que van realizar una exhibición pública del trabayu d’estampación in situ. Los grabaos van ser realizaos por dos técnicos, xunta un terceru, que va tar ente’l públicu y va encargase d’esplicar el proyectu a los espectadores. El públicu tamién va poder visitar la principal pinacoteca asturiana hasta les 02:00 hores.

Los artistes Tamara García y Ganzo van presentar na Sala d’Esposiciones del Bancu de Sabadell Homenaxe 68, un espectáculu audiovisual centráu na alcordanza, l’afirmación y denuncia de los fechos socedíos en 1968 en ciudaes como París, Praga y México. … El Coru Llión d’Oru na Catedral presenta un conciertu, nel que’l públicu va poder transitar por música de distintos oríxenes y estilos pa intentar remembrar la esencia de el color del soníu, daqué característicu de la exquisitez de la música coral.

Y en distintes localizaciones de la ciudá, los uvieinos podrán atopase con El mirón miráu, una performance na que l’artista Miss Beige va salir a les cais de la ciudá y va fotografiase con tou aquello y aquel que-y produz emoción, intriga y dolor de barriga, buscando siempres la prevocación y la reflexón al traviés del xuegu.

La poesía torna a la Plaza del Paragües Pelos caminos de la torna: recital de Hasier Larratxea xuntu a los sos padres. Lo que simboliza la familia Larretxea-Gortari nel escenariu ye la grana del realcuentru ente xeneraciones, el diálogu ente la tradición y la vanguardia, l’home del monte y deportista rural col fíu poeta.

Delles galeríes de la ciudá xúnense a la Nueche Blanca. Les ilustraciones de Cristina de Middel, en VitrinaDolsé; The Leg Cutter y El suañu de Warhol, en Decero Creativu; BIOS, en Estudio Pablo de Lillo; Stella Rexente, nel Hotel Rexente; Pablo Bruera: Eppur si muove, en Galería Llucía Dueñes, y D&M, en Falcon Gallery Studio.

Nesta sesta edición de la Nueche Blanca, los uvieinos volverán esfrutar de los cantares de la comunidá de monxes benedictines; visitar la central de Telefónica, el patrimoniu de la Fábrica de La Vega y la colección d’arte de la Fundación Princesa d’Asturies, y percorrer la Ruta d’Ochobre del 34.

Per tercer añu consecutivu, la Nueche Blanca convoca un concursu de fotografía al traviés de Instagram. Les meyores semeyes de les intervenciones artístiques y de los espacios participantes na Nueche Blanca, col hashtag nbOVD18semeya van tener premiu. van premiase cuatro semeyes y cada ganador llevará dos entraes pa una representación de Tosca, d’Ópera d’Uviéu, y una visita empuesta poles instalaciones del Teatru Campoamor, pa ver cómo ye una ópera per dientro. va visitase l’escenariu, camarinos y el backstage.