Portada Cine La Mostra de Venecia caltiense en septiembre con menos películes y estrelles

La Mostra de Venecia caltiense en septiembre con menos películes y estrelles

by redacción asturnews

La Mostra de Venecia caltiense en septiembre con menos películes y estrelles y va ser del 2 al 12 de setiembre con aforu amenorgáu y midíes de seguridá contra’l coronavirus.

El 77º Festival de Cine de Venecia va ser en septiembre magar la pandemia de coronavirus, tal que taba previstu, confirmó’l presidente de la rexón del Veneto (norte), Luca Zaia, anque va tener midíes de seguridá y probablemente menos películes. “La Mostra hai que faela. El comité técnicu-científicu diz que les elecciones (rexonales) pueden celebrase en septiembre. Polo tanto esi mes paez sele”, dixo Zaia en rueda de prensa.

Esti festival de cine internacional, unu de los más importantes del mundu, va celebrase ente’l 2 y el 12 de setiembre, anque nos últimos tiempos surdieren duldes pola pandemia de coronavirus, qu’afectó especialmente al norte italianu. “El periodu paez óptimu (…) Va ser una oportunidá pa faer ver qu’equí tamos resurdiendo”, refirió’l gobernador, miembru de la mesma del Conseyu d’Alministración de la Bienal de Venecia.

El nuevu presidente de la Biañal, Roberto Cicutto, dixo a la canal pública RAI que la Mostra nun se va desenvolver “dafechu” como otros años una y bones les películes tendrán de proxectase en más sales al empar pa la prensa, pos l’aforu va vese amenorgáu pa evitar andaes. Amás espérase una “amenorgamientu de títulos” nel programa de la Mostra y “probablemente” nun van llegar tantes estrelles del cine como les qu’acostuma a recibir el luxosu Lido venecianu.

Cicutto aseguró que los periodistes estranxeros que nun puedan llegar a Venecia poles llimitaciones a los viaxes van poder siguir les ruedes de prensa y prometió xuna Mostra de “calidá con toles midíes de seguridá” contra’l coronavirus.

Venecia atropa les miraes dempués de qu’otru de los grandes festivales europeos, el de Cannes (sur de Francia), que tendría d’empezar el pasáu 12 de mayu, retardara la so celebración por causa de la pandemia. El delegáu xeneral del festival, Thierry Frémaux, avanzó qu’a estes altures resulta complicáu contemplar la posibilidá de qu’haya xuna edición física en 2020 y señaló que van publicar a principios de xunu una llista de les películes que formaren la selección oficial de l’amuesa.

Per otru llau Venecia, mientres caltien la prestixosa Mostra del Cine, aplazó al 2021 la Bienal d’Arquitectura y al 2022 la d’Arte.

Tamién te podria gustar