La mocedá d’Uviéu fala col alcade de les sos esmoliciones

La mocedá d’Uviéu fala col alcade de les sos esmoliciones
19 febreru 18:19 2019 Imprimir

Un total de 30 representantes de los 14 grupos de participación infantil y adolescente d’Uviéu esplicaron al Alcalde y a la conceyala d’Atención a les Persones los asuntos que más-yos interesen y sobro los que lleven trabayando dende setiembre del añu pasáu. Los derechos de la infancia, la meyora de barrios y colexos o los xuegos son dalgunos de los asuntos que presentaron nuna audiencia celebrada nel Teatru Filarmónica.

Los derechos de la infancia, la meyora de los barrios, los escrementos de perru o los xuegos son dalgunes de les esmoliciones de los nuesos mozos y moces. Y asina y lo foron esplicando al Alcalde, Wenceslao López, y a la conceyala d’Atención a les Persones, Marisa Ponga. Un total de 30 representantes de los 14 grupos de participación infantil y adolescente d’Uviéu (representen a un total de 140 mozos y moces d’Uviéu) esplicaron al primer edil los asuntos que más los esmolecen y sobro los que lleven trabayando dende setiembre del añu pasáu. L’Audiencia empezó cola dinamización de Los Glayus y una contextualización del actu.

Los representantes d’Olloniego centráronse na campaña contra caques  de perru nel so barriu, la mani-festi-acción y la presentación del cluedo polos derechos de la infancia. Dende La Corredoria apurrieron propuestes pa la meyora y esplicaron el proyectu d’investigación que tán faciendo sobro “ser adolescente nos nuesos tiempos”.

L’alumnáu del colexu Nazaret presentó un proyectu pa re-escribir hestories o cuentos conocíos que frayen los derechos de la infancia y el de Latores, propuestes p’ameyorar el so colexu y delles zones de la ciudá.

El colectivu Alfalar centróse na meyora de La Corredoria y los Escolinos ACCEM, amosaron un trabayu sobro’l Derechu al Xuegu y un proyectu pa crear una enciclopedia de xuegos. Tres Aldegues Infantiles, tocó-y la vez a los representantes de Trubia, con propuestes per parte de les necesidaes de la infancia, y presentación del xuegu “El pueblu de los derechos”. Xuegu de mesa versionando el “El Llobu”.

Per Ventanielles, l’Alcalde recibió propuestes  p’ameyorar la infraestructura del barriu y presentación de la carrera contra la violencia infantil y los bonos tratos. Y el colexu Buenavista II presentó un vídeu resumen de lo que lleven trabayáu hasta agora sobro los derechos de la infancia. Tamién con soporte gráficu, los representantes d’Anieves proxectaron un vídeu pa esplicar el proyectu de pintada d’una de les parés del barriu.

L’alumnáu de La Xesta centróse nes dinámiques de promoción y espardimientu que tán poniendo en marcha por que se xunan más chicos y moces.

  Categories: