La mocedá avilesina participa n’intercambios xuveniles en Francia y Portugal

La mocedá avilesina participa n’intercambios xuveniles en Francia y Portugal
28 xunu 12:06 2019 Imprimir

Un total de 19 mozos van participar en dos intercambios xuveniles en Francia y Portugal esti branu, al traviés de la Oficina de Movilidá Xuvenil Internacional d’Avilés y dientro del programa Erasmus+: Mocedá n’Acción”.

El Serviciu de Mocedá del Conceyu d’Avilés, al traviés de la Oficina de Movilidá Xuvenil Internacional “Europa Equí”, entama y collabora nel intercambiu d’un total de 19 mozos de la ciudá menores de 25 años, que van participar nel mes de xunetu en dos proyectos en Portugal y Francia. Estos proyectos inclúyense dientro del programa Erasmus+: Mocedá n’Acción” de la Comisión Europea, que tien como oxetivu sofitar a la educación, formación, mocedá y deporte n’Europa.

El primeru de los intercambios lleva por títulu “Youth Sparkles! Connect to diversity”, y va tener llugar en Vizela (Portugal) ente’l 14 y el 21 de xunetu. Dende Avilés van viaxar 8 mozos y 2 persones responsables, que van formar parte d’un grupu de 40 persones -32 participantes d’ente 16 y 25 años, y 8 monitor/as-, procedentes de Bremen (Alemaña), Dublín (Irlanda) y de la mesma localidá portuguesa.

Les persones escoyíes tuvieron participando mientres l’añu en proyectos locales de voluntariáu. 8 van collaborar nun proyectu de diversidá, inclusión y participación xuvenil en Vizela (Portugal), xuntu con nuevos tantu locales como procedentes d’Alemaña ya Irlanda. Los y les 11 restantes van trabayar con mozos d’Alemaña y Francia en Gironde (Francia) nun proyectu de naturaleza y diversidá.

Les temes del intercambiu van ser per una parte la diversidá ya inclusión, y pol otru, la participación xuvenil como axente tresformador de la sociedá. va trabayar sobro la pluralidá de cultures, la globalización, estereotipos, y la reflexón de cómo pueden los mozos camudar y construyir una sociedá más inclusiva.

La organización anfitriona ye l’asociación portuguesa Vizela ImaginActiva, que lleva collaborando con Europa Equí en distintos proyectos dende 2012. El segundu intercambiu tien como lema “Diversity! Diversidá y naturaleza n’Europa”, y va  desenvolvese ente’l 13 y el 21 de xunetu en Gironde (Francia). Nesti casu, 11 avilesinos y avilesines al pie de 3 persones responsables van xunir a un grupu de 42 persones -36 moces d’ente 13 y 18 años, y 6 monitor/as-, que van venir dende Wiesbaden (Alemaña) y Francia.

L’intercambiu va tratar sobro la diversidá y la naturaleza n’Europa, y va trabayase al traviés d’actividaes al campu y nel mediu natural. L’asociación internacional Controle Z Nouvelle Aquitaine, que yá collaboró la Oficina de Movilidá Xuvenil Internacional en 2017, va ser la anfitriona.

El programa Erasmus+: Mocedá n’Acción” de la Comisión Europea cubre al 100% los gastos d’agospiamientu y mantención. Pal viaxe da una beca que, nel casu d’estos dos proyectos, va ser de 180€. Si’l viaxe tuviera un preciu mayor, va ser la persona participante la qu’abone la diferencia. L’idioma pa rellacionase va ser l’inglés, pero se debe tener en cuenta que l’intercambiu nun ye un cursu d’idiomes, polo que ye bien importante la predisposición pa comunicase de los y les participantes y el sofitu ente elles pa llogralo.

Les persones escoyíes van tar implicaes nel procesu tantu antes como dempués del intercambiu: apurriendo idees, proponiendo actividaes y espublizando la so esperiencia al regresu. Van Cuntar les sos vivencies nel programa de radio Europa Equí de La Radiadora, el proyectu de radio online del Serviciu de Mocedá.

  Categories: