La metá de los neños y neñes que van al colexu pel branu esfruten d’una beca

Más de la metá de los neños y neñes qu’alleguen al colexu pel branu esfruten d’una beca para almuerzu y comedor y el 26 per cientu de los usuarios del programa d’apertura de centros, con récord históricu de matrícula, tienen una bonificación del 100%.

La Xunta de Gobiernu del Conceyu d’Uviéu dio esti xunetu lluz verde a les beques p’almuerzos y comedor de les families con menores esfrutando del nuevu programa d’apertura de centros pel branu del Conceyu d’Uviéu. Un total de 4.176 usuarios del serviciu resultaron beneficiarios d’ayudes para almorzar y comer n’unu de los siete colexos qu’abren les sos puertes na capital asturiana mientres los meses de branu. D’esta miente, les bonificaciones lleguen a un 52 per cientu de los usuarios, más de la metá de los 7.990 escolares que s’apuntaron al programa. Amás, un 26 per cientu de los usuarios aportaron a una bonificación íntegra del serviciu, del cientu per cientu, y nun van tener que sufragar gastu dalgunu.

El programa d’apertura de centros pel branu batió anguaño un nuevu récord históricu d’usuarios, con 8.000 neños y neñes apuntaos. “Les cifra global d’usuarios y la demanda de comedor y almuerzos demuestra que sí que faía falta, y enforma, abrir los colexos mientres el branu”, según apuntó la conceyala d’Educación d’Uviéu, Mercedes González (Somos). El  nuevu gobiernu municipal amplió en diez selmanes el programa: agora siete colexos de la ciudá abren les sos puertes mientres 14 selmanes pel branu, ente que los anteriores gobiernos desoyíen esta demanda y solo ufiertaba cuatro selmanes d’apertura, ensin cuntar amás col actual sistema de bonificaciones del serviciu a les families.

Nel cómputu global les beques escolares tamién se multiplicaron anguaño. Esti tipu d’ayudes tán sofitaes por un presupuestu global de casi 3,5 millones d’euros, una cuantía que dobla a la del cursu 2014/15, el postreru del anterior gobiernu municipal n’Uviéu. Pal próximu periodu lectivu hai concedíes 3.976 solicitúes más que va trés años y los servicios sociales municipales revisen tol procesu para garantizar que nenguna familia que cumpla los requisitos quedar ensin esti tipu d’ayudes. “Consiguimos que tolos neños d’Uviéu tengan satisfeches les sos necesidaes básiques”, sostien la concejala d’Educación “Sofitamos los nuesos compromisos con fechos y tamos entornaos colos intereses de la ciudadanía uvieina”, sorraya Mercedes González sobro l’esfuerzu presupuestariu.