La matrícula en FP xube un 8%, pero entá nun da respuesta a tola demanda empresarial

La Formación Profesional tien una importancia estratéxica tantu dende’l puntu de vista social como económicu sigún Manuel Capellán, director xeneral d’Enseñances Profesionales y Aprendizaxe Permanente. Baste solo un datu: el 75% de los puestos de trabayu correspuenden a cualificaciones de FP y por mor d’ello la matrícula en FP xube un 8%, pero entá nun da respuesta a tola demanda empresarial.

Según los datos de la Dirección Xeneral d’Enseñances Profesionales y Aprendizaxe Permanente, na primer fase d’almisión, que s’acaba de cerrar, solicitaron plaza para los graos mediu y cimeru un total de 8.454 mozos y moces, ente que nel mesmu periodu del añu pasáu fueron 7.769. Ganen estos estudios, poro, 685 futuros alumnos; esto ye, un 8,6%. Va Haber que sumar depués los que se matriculen na fase estraordinaria, en septiembre. Del total, 3.463 van empezar un grau mediu y 4.991, un grau cimeru. Los datos «son alentadores, porque demuestren el creciente interés y positiva valoración de la sociedá», felicítase Capellán, anque alvierte de qu’hai que siguir trabayando, ente otres coses na orientación profesional porque se repara un desequilibriu ente los deseos de los ciudadanos y les necesidaes del sistema granible».

En total , nesti últimu cursu, daqué más de 16.000 asturianos y asturianes cursaron Formación Profesional, incluyendo los 866 alumnos de la FP básica. Facer en delles de les más de 100 titulaciones que pueden faese na rexón, onde esisten ocho centros integraos de FP, 47 IES con ufierta d’esta formación y nueve centros alcordaos. Hai datos claros que «dan idea de que vamos pel bon camín y que la sociedá empieza a ser consciente del valor de la FP». El cursu pasáu había 7.500 alumnos matriculaos en primer cursu de FP, ente que en primeru de Bachilleratu hai 6.000 y nel primer cursu de graos universitarios, 4.300, recuerda Capellán. La FP asturiana expede cada añu 4.500 títulos, polos 3.000 de la Universidá y hai otros 2.900 certificaos de profesionalidá.

La FP, tan desfamada n’otres dómines, ta camudando la so imaxe. Tanto interés en consiguilo tienen l’alministración como los empresarios, que coinciden na necesidá de meyora de la orientación profesional en toles etapes y especialmente en Secundaria, por que families y alumnos conozan «la realidá del mercáu llaboral» y poder amenorgar los desaxustes» ente dichu mercáu y l’ufierta de cualificaciones «que nun absuerbe’l sistema».

Dende l’Alministración rexonal tamién s’avanza. Ello ye que el próximu cursu van enllantase dos nuevos ciclos. Per un sitiu, el IES de Lluces, en Colunga, va ufiertar Ganadería y asistencia en sanidá animal, un grau cimeru totalmente nuevu n’Asturies. Por otru, el IES Bernardo de Quirós de Mieres programó Desenvolvimientu d’aplicaciones web, tamién grau cimeru. Y hai trés ciclos que se van tresformar: Servicios Alministrativos, nel IES de Pravia, que yera de FP básica, pasa a ser Xestión alministrativa, unu mediu; Instalaciones de producción y calor, nel IES Isla de la Deva, en Piedres Blanques, va ser Instalaciones frigorífiques y de calefacción; y Electromecánica de vehículos automóviles pasa a ser Carrocería, calteniéndose como grau mediu.

Ente tola ufierta, les cinco families profesionales más demandaes son Sanidá (2.74 solicitúes), Informática y comunicaciones (881), Alministración y xestión (678), Servicios socioculturales y a la comunidá (591), Fabricación mecánica (515). Pero l’abanicu pa escoyer ye bien ampliu. N’Asturies, la FP puede formar en producción agroecológica, n’impresión gráfica y pa ser discjokey; puede aprender a ser panaderu y repostero, protésico dental o educador infantil; puede titulase en mecanizado, soldadura y calderería, cosmética capilar, robótica industrial, xestión d’eventos y pesca d’altor. Dende la conseyería defenden que «nesta llexislatura tratemos de sacar la FP del contestu escolar p’averala a la sociedá y al sistema granible», ente otres coses col diálogu con Fade, Cámares de Comerciu y sindicatos. «Tamos remando de forma coordinada anque inda nun movemos cola velocidá que nos gustaría», diz Manuel Capellán.