La matrícula de la Universidá Popular Uvieina aumenta un 42 per cientu nun añu

La matrícula de la Universidá Popular Uvieina aumenta un 42 per cientu nun añu
11 ochobre 08:48 2017 Imprimir

La demanda de matrícula de la Universidá Popular Uvieina aumentó un 42 per cientu solo nun añu, dende la puesta en marcha d’esti nuevu serviciu que depende de la Conceyalía d’Educación que dirixe Mercedes González  de Somos Uviéu.

Un total de 1.976 persones solicitaron plaza n’unu de los 38 cursos que s’ufierten para’l primer trimestre del cursu 2017-2018, lo que supon un aumentu de les asignatures ufiertaes en cursos anteriores y un refuerzu del programa con otres 13 temátiques más. Les asignatures rellacionaes cola hestoria, les emociones y la nutrición son les más solicitaes pol alumnáu, toes con llista d’espera.

Hai llista d’espera pa casi tolos cursos y les places tuviéronse que llevar a un sortéu públicu pala so axudicación. Les asignatures más demandaes pola ciudadanía son les rellacionaes cola hestoria, les emociones y la nutrición, en dellos casos col triple de solicitantes per plaza disponible. “Tuvimos muncha demanda en tolos cursos, especialmente les nueves ufiertes d’hestoria, la área de competencies emocionales y l’alimentación saludable, toes con llista d’espera”, esplicó la conceyala d’Educación, Mercedes González.

Coles mesmes, Merced González destacó la esistencia d’una nueva páxina web www.popularovetense.es onde se va informar de tola actividá de la Universidá Popular Uvieina, la programación cultural que s’entame de forma puntual y los nuevos cursos y talleres que se van incorporar a la ufierta para’l segundu trimestre.

La Universidá Popular, un nuevu serviciu na ciudá para democratizar la cultura y la conocencia, ye una iniciativa desenvuelta pola Conceyalía d’Educación del Conceyu d’Uviéu tres la so llegada al gobiernu municipal que cunta yá cola reconocencia fora d’Uviéu, tres la so inclusión na Federación Española d’Universidaes Populares y gracies a proyectos como’l programa SARA (compartíu cola Conceyalía d’Emplegu), que dexó a muyeres uvieines atopar un emplegu nel ámbitu sociosanitariu. Dende la so puesta en marcha l’añu pasáu, la demanda llegó a superar a la ufierta con llista d’espera y un aumentu progresivu de los alumnos matriculaos en cada trimestre, dende los 847 iniciales a los 1.976 actuales. 

  Categories: