La marcha poles pensiones dignes salió d’Uviéu

Con esta movilización, convocada por Comisiones Obreres y UXT y que va aportar a Madrid el 9 d’ochobre, reclámase que “s’asegure’l presente y futuru” de les pensiones, el poder adquisitivu de los pensionistes y que se erradique el déficit de la Seguridá Social.

L’Alcalde, Wenceslao López y los conceyales de Cultura, Roberto Sánchez Ramos; Servicios Básicos, Ana Rivas; Seguridá Ciudadana, Ricardo Fernández y el conceyal Diego Valiño, recibieron na Plaza de la Constitución a los participantes na marcha poles Pensiones Dignes convocada por UXT y Comisiones Obreres. Con esta movilización, que los va llevar hasta Madrid, onde van celebrar una manifestación el día 9 d’ochobre, los sindicatos quieren denunciar la ineficacia del gobiernu central para encetar el desequilibriu financieru de les cuentes de la Seguridá Social, consumiendo anticipadamente el Fondu de Reserva. Amás critiquen que les pensiones revalorícense namá un 0,25% cada añu, lo que supon una continua perda de poder adquisitivu per parte de los beneficiarios y sorrayen qu’el 50% de los pensionistes nun llega al SMI y el 38% vive sol estragal de la probeza. Recuerden tamién que 4 de cada 10 pensionistes contribuyeron a sostener a les sos families mientres la crisis.

Por too ello, los sindicatos reclamen que s’asegure’l poder adquisitivu de los pensionistes, que se erradique’l déficit de la Seguridá Social y que se garantice “el presente y el futuru” de les pensiones. El Plenu del Conceyu d’Uviéu del mes de setiembre dio lluz verde (colos votos a favor de SOMOS, PSOE ya IX, en contra los del PP y l’astención de ciudadanos) a la moción presentada por Comisiones Obreres y UXT en defensa del sistema públicu de pensiones y amosó el so sofitu a la convocatoria d’esta marcha.