Portada Cooperación La Llume cumple añu con Xornaes culturales

La Llume cumple añu con Xornaes culturales

by redacción asturnews
Cartelu de les Xornaes niversariu de La Llume con toles actividaes

El día 13 de Setiembre fadrá un añu dende qu’inauguraran el Centru Social La Llume y por mor d’ello, a lo llargo d’esa fin de selmana van desenvolvese unes xornaes que van incluyir charres, talleres, conciertos como’l que xuntará esi mesmu día a grupos como Orgullo Sucio, Wayne Fernández +DJJota, De Jota y Micro Libre.

Dende aquel 13 de setiembre d’hai un añu, y con tol trabayu previu y posterior, los fundadores intentaron “facer del nuesu centru social un llugar de reunión y de movilización de la mocedá parao y precario d’Asturies. Nestos 365 díis pasastis pela Llume una montonera de colectivos y de persones de munchos llugares, coles que compartimos munches esperiencies perinteresantes, que nos ayudaron a siguir medrando y de les que tamos mui agradecíes”, dicen nuna nota cola que fain el llamamientu “pa celebrar esti primer aniversariu con vosotres, convidándovos a participar y disfrutar con nós de les Xornaes d’Aniversariu que vamos organizar los díis 11, 12 y 13 de Setiembre nel nuesu centru social”.

Nestes xornaes, contarase tamién con munches actividaes interesantes, charres, talleres, conciertos y muncho más, qu’entamen el vienres 11 falando del propiu centru de los proyectos cooperativos pa promover l’emplegu. Esi mesmu día a les 9 habrá una timba poética al cargu de Sergio Taboada y Pablo X. Suárez y un conciertu de la mano de Dive’n Bourbon.

A lo llargo de la Xornada del sábadu y amás del conciertu mentáu habrá talleres de defensa personal femenina y de boxéu y una espicha popular, xunta una conferencia sobre la hestoria del movimientu LGTB.

Pa finar, el domingu 13, un vermú ambientáu por el DJ Ciareslautern y un mercáu d’artesanía y coleutivos sociales va dar pasu a una fabada popular.

El centru Social La Llume emplega siempres la llingua asturiana como llingua vehícular de toles sos actividaes.

Tamién te podria gustar