Portada Uncategorized La llingua aporta con normalidá a la vida institucional universitaria cola primer promesa d’un Vicerrector n’asturianu

La llingua aporta con normalidá a la vida institucional universitaria cola primer promesa d’un Vicerrector n’asturianu

by redacción asturnews
Semeya del nueu equipu rectoral

Nuna nuea exemplificación del enfotu del Rector Santiago García Granda por que la llingua asturiana aporte con normalidá a la institución que preside, el Paraninfu de la Universidá d’Uviéu acoyía esti llunes pela mañana a la primer promesa en 400 años d’un Vicerrector n’asturianu, col xuramentu como Vicerrector del Delegáu del Rector de Coordinación, Xicu Xabiel García Pañeda.
Esti llunes pela mañana tomaba posesión nel Paraninfu  l’equipu que va face-y compaña al Rector demientres los próximos cuatro años y xunta xuramentos y promeses en castellán sintíase per primera vegada en 400 años la llingua asturiana na promesa del Delgau del rector de Coordinación y Estratexa Universitaria, Xabiel García Pañeda.

“Faigo promesa de cumplir dafechu les obligaciones de Delegáu del Rector de la Universidá d’Uviéu, con llealtá al Rei y curiar y facer curiar la Constitución como norma cimera del Estáu, l’Estatutu d’Autonomía del Principáu d’Asturies y tamién los Estatutos de la Universidá d’Uviéu”. Con estes pallabres facía promesa de les sos responsabilidaes Xabiel García Pañeda y respondía-y darréu’l Rector, otra vuelta en llingua asturiana, recordando-y que si  cumpliera pa con ello-y lo premiara la Universidá y si non-y lo reclamara.

L’equipu rectoral que tomó posesión esti llunes ta formáu polos vicerrectores Juan José del Coz (Organización Académica), José Ramón Obeso (Investigación), Francisco José Borge (Estensión Universitaria y Proyección Internacional), Elisa Miguélez (Estudiantes), Marta María Hernando (Recursos Materiales y Tecnolóxicos), Eugenia Suárez (Acción Tresversal y Cooperación cola Empresa), y la secretaria xeneral, Eva María Corderu, el delegáu de Coordinación y Estratexa Universitaria, Xabiel García Pañeda y el xerente, Lorenzo Almanza. A toos ellos pidió-yos Santiago garcía Granda  que “pongan lo meyor de cada unu al serviciu de la Universidá” ya, inclusive, esixó-yos que “sacrifiquen cualquier ambición personal tamién al serviciu de la institución académica”.

Tamién te podria gustar