La Llaboral va agospiar l’Asamblea constituyente del “Espaciu Iberoamericanu de Mocedá”

09 setiembre 03:48 2008 Imprimir

El Director de l’Axencia Asturiana de Cooperación al Desendolcu, Jacinto Braña; el Director del Institutu Asturianu de Mocedá, Guillermo Martínez; Secretariu Xeneral Axuntu de la Organización Iberoamericana de Mocedá, Jose Manuel Miguel Ruiz; y Javier Igareda, de la Comisión Permanente del Conseyu de Mocedá d’España, presentaron na sede de la Conseyería’l “Espaciu Iberoamericanu de Mocedá”. Esti foru d’alcuentru de los y les moces d’Iberoamerica va celebrar la so Asamblea constituyente los díes 26, 27 y 28 de setiembre en Llaboral, Ciudá de la Cultura, en Xixón, coincidiendo colos Alcuentros Internacionales de Mocedá de Cabueñes, que van tener batura del 22 al 26 de setiembre. Por embargu, esta Asamblea, más allá d’un espaciu de constitución formal de la plataforma, tien los siguientes oxetivos:

  1. Treslladar el compromisu de les instituciones y los gobiernos col axixamientu de la participación xuvenil como ferramienta pal fortalecimientu de les sociedaes democrátiques.
  2. Presentar los trabayos y les demandes del movimientu asociativu xuvenil en rellación al Añu Iberoamericanu de Mocedá y al XVIII Cume Iberoamericanu de Xefes d’Estáu y de Gobiernu.
  3. Formalizar la constitución del Espaciu Iberoamericanu de Mocedá como plataforma interasociativa referente en materia de polítiques xuveniles y algamar la so reconocencia como referente na interlocución con instituciones públiques sobre’l desendolcu de la mocedá y de les polítiques empobinaes a ellos na rexón.

Nesti momentu, el “Espaciu Iberoamericau de Mocedá”, abiertu a nueves incorporaciones y que trata d’amosar la diversidá d’intereses y propuestes de la mocedá asociada, ta compuestu por 24 entidaes, de les qu’ocho son plataformes y conseyos de mocedá y 17 son organizaciones xuveniles d’ámbitu internacional.
No que cinca a los y les asistentes a esti alcuentru que va tener batura en Xixón son yá más de 30 los representantes de les más importantes plataformes, conseyos y organizaciones asociatives xuveniles que confirmaron la so presencia. Los países de los que provienen, 14 en total, son Arxentina, Brasil, El Salvador, Paraguay, Panamá, Nicaragua, Portugal, Ecuador, Colombia, Guatemala, Mexico, Perú, Costa Rica y España.
En concreto, esta celebración va contar cola participación de la Plataforma Federal de Mocedaes Arxentines, el Fórum Nacional de Movimentos e Organizaçoes Juvenis de Brasil, la Rede Xuvenil d’El Salvador, Ecoclubes, Cruz Roxa Mocedá, el Movimientu Scout, l’Asociación Mundial de les Guíes Scouts, International Union of Socialist Youth, la Organización continental llatinoamericana y caribeña d’estudiantes, la Federación Mundial de la Mocedá Democrática, el Movimientu Internacional de la Mocedá Agraria y Rural Católica, el Movimientu Internacional Falcons – Internacional Socialista Educativa, la Rede Llatinoamericana de Mozos Indíxenes, la Rede Llatinoamericana y Caribeña de Mozos polos Derechos Sexuales y Reproductivos, ACJ´s – YMCA, AFS Programes Interculturales, la Central Sindical de les Ameriques, la Federación Internacional de Mozos Lliberales, Rotary International, l’Asociación Iberoamericana de Mozos Cooperantes y los Conseyos de Mocedá d’España, Nicaragua, Panamá, Paraguay y Portugal.

  Categories:
Loading Facebook Comments ...