La Llaboral acueye esti sábadu la celebración de la Copa Cantábrica de Liriu

El sábadu día 1 d’avientu, a partir de les 11 hores, el Patiu de Llaboral Ciudá de la Cultura va acoyer la celebración de la Copa Cantábrica de Liriu/Billarda; un tornéu disputáu ente la selección de liriu d’Asturies y la de billarda de Galicia (conocida como “A Auténtica”) que se vien disputando dende l’añu 2007.

Col nome de liriu conózse n’Asturies un refileru de xuegos que tienen como puntu en común l’usu de dos pieces de madera: una allargada, la “machorra”, y otra más pequeña y afilada pelos estremos, llamada “liriu”. L’acción motriz común d’estos xuegos ye la siguiente: el xugador tendrá que llevantar el liriu del suelu golpiándolu cola machorra y, una vez tea nel aire, aventa-y otra vuelta, bien p’alloñalu lo más que se puea, bien pa empobinalu a un sitiu determináu. Tradicionalmente yera un xuegu de cai practicáu por neños, anque non privativamente por varones.

Liriu y billarda son dos xuegos tradicionales que comparten la mesma aición motriz. El liriu ye propiu d’Asturies y dende l’añu 2009 ta supervisáu pol Conceyu Nacional de Liriu (CNL), qu’organiza eventos competitivos y d’espardimientu. La billarda (nome que tamién recibe’l liriu na zona eo-naviega) tien una mayor tradición competitiva alrodiu de la Liga Nacional de Billarda.

Les dos primeres ediciones de la Copa Cantábrica de Liriu disputáronse baxo la normativa gallega, pero dende l’añu 2009 la modalidá de xuegu ye la del liriu a encastrar reglamentada pol CNL. El troféu de la Copa Cantábrica queda en propiedá de la seleiccón que venza cinco vegaes na competición o trés de secute. De momentu, Galicia venció en trés ocasiones por una d’Asturies.

Información sobre’l Liriu