La IV Nueche Negra d’Avilés propón una ventena d’actividaes culturales

La IV Nueche Negra d’Avilés propón una ventena d’actividaes culturales
23 10:53 2015 Imprimir

La Nueche Negra d’Avilés celebra la so cuarta edición el vienres 27 de noviembre con más de veinte actividades culturales que se desenvuelven na Factoría Cultural y tamién n’otros espacios culturales d’Avilés.

Como n’ediciones anteriores, la Factoría Cultural cuenta cola collaboración d’entidaes privaes y asociaciones culturales pal desenvolvimientu de toles actividaes previstes y abre l’abanicu d’artistes participantes. Coles mesmes, el públicu va tener ocasión de participar viviegamente en munches de les intervenciones artístiques.

Los espacios participantes na edición d’anguaño son: Factoría Cultural, Muséu d’Avilés, Conservatorio Julián Orbón, Conceyalía de Mocedá, Palaciu de Valdecarzana, Escuela d’Artes y Oficios, Art Street, Galería Amaga, Galería Octógono, Centru Niemeyer, Plaza de Santiago López, Centru de Servicios Universitarios, Escuela Cimera d’Arte, Taller de Nachu Suárez, Habitación Blanca. Hostelería y Club d’Empreses d’Avilés.

Novedaes a destacar anguaño son la collaboración del Club d’Empreses y de los hoteles d’Avilés qu’inclúin na so ufierta la programación de la Nueche Negra como aliciente pa visitar la ciudá.

Amás, l’artista multimedia, profesor ya investigador audiovisual Roberto Lorenzo va participar nuna instalación artística visual nun espaciu de la ciudá entá por determinar.

La celebración ta basada nel “Samhain”, el festival d’orixe celta más importante del periodu paganu qu’apoderó Europa hasta la so conversión al cristianismu. Celebra’l fin de la temporada de la collecha celta y da empiezu a la Estación Escura. El calendariu celta estremaba l’añu en dos mitad: la metá Escura, qu’empezaba nel mes d’ochobre o payares, cuando los espíritos de los difuntos teníen autorización pa caminar ente los vivos; y la metá Clara,que s’empecipiaba en  redol a los meses d’abril – mayu.

De la mesma manera que nel mes de mayu celebra la Nueche Blanca, movimientu que tien como fin sacar l’arte a la cai y faelo accesible al públicu infantil, xuvenil y adultu, en contraposición preséntase la Nueche Negra, que’l so oxetivu ye averar l’arte a la ciudadanía, amosar los distintos espacios culturales y artísticos qu’a lo llargo del añu realicen distintos proyectos o actividaes.

Programa IV Nueche Negra d’Avilés

Muséu d’Hestoria Urbana.  Ampliación del so  horariu hasta les 22 hores y visites  empuestes a les 19:00 y 20:30 hores que van tar acompañaes d’un conciertu de música al cargu de los alumnos del conservatorio Julián Orbón y de un espectáculu de danza coles escueles de Teresa Tessier y de Myrian Chamorro.

Solistes de cuerda y guitarra, amás de pequenos grupos de cámara, van ser los encargaos de poner música nesi espaciu singular, que convida a la reflexón contemplando la hestoria milenaria de la nuesa villa. Dende la intimidá de la guitarra clásica, hasta la voz bonable y casi humana del fagó, con obres de Mozart, Beethoven y los suramericanos Antonio Lauro o Diego Puyol, van tener cabida ente les sos parés.

Plaza de Santiago Lópe

-16 a 19 hores. “Dexé la Obra Tendida. Acción Solidaria”. El taller de Nachu Suárez propón una instalación interactiva con participación abierta. L’actividá empieza col tendal apináu de papeles en blancu que se van dir interviniendo por aciu técniques mistes a lo llargo de la tarde y que va poder participar bonalmente los artistes que se sumen. Les obres realizaes van poner a la vienta y la recaldación va donar a una ONG.

-16 a 19 hores. “Caricaturízate”. L’alumnáu infantil del taller de Nachu Suárez va realizar caricatures del públicu que s’empreste y van vender por un módico preciu. La recaldación va dir a una ONG

-19:30 hores. Espectáculu de maxa acompañando con música electrónica amplificada al cargu de Mind Revolution.

Palaciu de Valdecarzana. 18 hores. Retroproyección de los artistes Luis Parades y Héctor Jácome. Proyección sobre’l trabayu del vidriu n’Asturies, que puede contemplase dende l’esterior al pasiar xuntu al edificiu.
Escuela d’Artes y Oficios. De 18 a 22 hores. “Exquisitez negra”. Participantes Visual Jazz Proxecto Favila, Guillermo Fernández, Eva Barona y Samuel  Armes. Realización d’una obra de gran formatu que la so metodoloxía basar nuna reinterpretación del conocíu xuegu dadá (cadabre esquisitu). L’actividá va empezar cola creación individual d’un motivu concretu per parte d’unu de los integrantes. Darréu va tapase parte de la obra dexando otra sección que va deber de siguir el siguiente artista, y asina sucesivamente col restu del equipu y públicu dispuestu a collaborar. Los materiales que de van utilizar na actividá va ser un soporte planu lígneo, pintures vinílicas y brochas/pinceles, etc.
Centro Niemeyer.  Ampliación d’horariu y entrada gratuita a les esposiciones ya instalación artística “Box Sensation” del colectivu DV (Diana Coanda y Víctor Velasco).
Centru de Servicios Universitarios. Instalación artística al cargu de Charo López nel escaparate del edificiu de Servicios Universitarios.
Art Street. 17 hores. Esposición fotográfica de Ramón Tomás Díaz García, fotógrafu avilesín residente en Madrid. Apurre una mirada bien personal al mundu que nos arrodia. Esposición gratuita instalada nos locales de trés calles.

  Categories:
Loading Facebook Comments ...