Portada Conceyos La IV Amuesa de Teatru Cómicu trai a Samartín hasta’l 4 de payares a 8 compañíes

La IV Amuesa de Teatru Cómicu trai a Samartín hasta’l 4 de payares a 8 compañíes

by redacción asturnews

Samartín del Rei Aurelio inauguró esti sábadu nel Teatru Municipal la IV Amuesa de Teatru Cómicu Asturianu que se va enllargar hasta’l 4 de payares cola participación d’ocho compañíes que van presentar distintes obres de xéneru risible y estilos variaos que van dende lo clásico hasta lo más contemporaneo.

La organización cuerre a cargu del Conceyu en collaboración cola Federación de Teatru Amateur d’Asturies (FETEAS). Les obres programaes son: La Máquina de retratar, presentada esti sábadu 16 de setiembre, al cargu de la Compañía Asturiana de Teatru; Les muyeres sabies, el 23 de setiembre, de Baluarte Teatru; L’Efectu Capacha, el 30 de setiembre, col grupu Teatru Carbayín; Vatericidio, el 6 d’ochobre, de la mano de Teatru Maliayo; siguíu por Cueses del más allá, el 13 d’ochobre, al cargu de Compañía Santa Bárbara; y a lo último, El Tontu ye un sabiu, el 21 d’ochobre, de La Capacha Teatru; Fabes, el 28 d’ochobre, con Teatru L’Horru; y Per ñarices, el 4 de payares, de la mano d’Irónicu Teatru.

Les funciones van empezar toes a la mesma hora, a les ocho, con un preciu de 5 euros, en taquilla, y de 4 euros en vienta antemanada en Turquesa y la sidrería El Semáforu, en L’Entregu.

Cola amuesa de teatru asturianu arrinca la temporada de teatru en San Martín tres un branu marcáu pola celebración de fiestes populares con una programación cultural centrada na cai. “Tamos énte una ufierta cultural escénica entretenida, variada tocantes a estilos y calidable pa esta seronda que vien de la mano d’ocho compañíes asturianes amateur, con una trayectoria solvente, sobradamente conocíes, que nos van presentar distintos espectáculos de xéneru risible, empobinaos al públicu adultu y a un preciu bien económicu pa incentivar l’asistencia, polo qu’animamos a los nuesos vecinos y vecines por qu’alleguen al teatru municipal y esfruten d’esta gran cartelera”, convidó la conceyala de Cultura, María Alonso.

Tamién te podria gustar