La III Ruta solidaria y cultural @GastandoSuela_ del Amor de Dios va ser el 29 de febreru

El Colexu Amor de Dios d’Uviéu entama, el próximu 29 de febreru, la ruta solidario y cultural ‘Gastando Suela’. La conceyala delegada de Polítiques sociales, Leticia González presentó, esta selmana, la tercer edición d’esta iniciativa que pretende superar los 600 participantes de 2018 y los 900 de 2019.

Les inscripciones pueden realizase hasta’l 17 de febreru na web del proyeutu. La conceyala tuvo acompañada pol alumnáu de cuartu de la ESO del Amor de Dios y representantes de Cáritas (Albergue Cano Mata Vigil y Centru de Día), Asociación Galbán, Adansi y de l’Asociación Duchenne Parent Project. El preciu de la inscripción ye de 3 euros y tou recaldar va ser destináu íntegramente a estes entidaes.

La conceyala destacó na presentación “un proyectu que pretende arreyar a tola sociedá, y naz col convencimientu de qu’un cambéu ye posible y que los mozos pueden ser parte activa d’ese camudamientu. Con esta actividá realízase una importante llabor de sensibilización social. Dende’l Conceyu y dende la conceyalía tamién trabayamos nesti oxetivu y animamos a tolos uvieinos”

El percorríu, con guíes que van ser alumnáu de cuartu de la ESO del Amor de Dios, va partir a les 10.30 hores del Colexo Amor de Dios faciendo parada en llugares emblemáticos de la ciudá como’l Palacete La Lila, l’edificiu ‘La Xirafa’, les Cases del Cuitu y la Casa Blanca, Bancu d’España y arcu del conventu de San Francisco, Xunta Xeneral del Principáu, El Termómetru, Teatru Campoamor, el Conceyu y l’Edificiu Históricu de la Universidá d’Uviéu, para rematar na Plaza de la Escandalera.

Los alumnos del Amor de Dios, Lucía Zarrada, Daniel Ledesma y María Fernández esplicaron que la ruta naz tres un analís de la realidá social d’Uviéu, con información facilitada por esti Conceyu y l’investigación de diverses entidaes y proyectos sociales de promoción ya insertamientu social. ‘Gastando Suela’ pretendi, amás dar a conocer enfermedaes como’l cáncer infantil o la distrofia muscular de Duchenne.